Вавож ёросысь егит спортменлы куас ботинкаос кузьмазы

Вавож ёросысь Нюрдор-Котья гуртысь 10 аресъем Даниллэн кемалась малпанэз быдэсмиз — солы куас ботинкаос кузьмазы. «Ёлка желаний» акция улсын солы таӵе кузьым лэсьтӥз Кун Кенешысь ужъя, мерлыко политикая но ветеранъёслэн ужпумъёссыя ялан ужась комиссилэн кивалтӥсез Елена Дербилова. Нялтас вераса, та акция радъяське Президент Владимир Путин кичӧлтэмъя. Элькун Тӧро Александр Бречалов сюлмаськемъя, акция Выль ар котырын гинэ уг радъяськы, ар ӵоже ортче. Ёрос администрациосысь кивалтӥсьёс, депутатъёс быдэсто ёрмись семьяосысь, озьы ик дышетсконын, спортын вормонъёс басьтэм нылпиослэсь куронъёссэс.
10 аресъем Данил куасэн бызьылыны яратэ. Пӧртэм соревнованиосын вормисе потамын. Солэн копилкаяз 86 медалез но 7 кубокез. Туэ со вормисе потӥз Череповецын ортчем спортивной семьяос пӧлын ӵошатсконын.
Даниллэн мукетыз но малпанэз быдэсмиз: пумиськылӥз Кун Кенешлэн Тӧроезлэн воштӥсеныз, мугорез кыдатонъя, спортъя но егитъёсын ужан политикая ялан ужась комиссилэн кивалтӥсеныз, биатлонъя дуннеысь куинь полэс чемпионэныз, олимпийской шудонъёслэн кык полэс азвесь призёренызы Иван Черезовен.