Туннэ Росси куншетлэн нуналыз

Таин валче шаерамы туннэ трос ужрадъёс — акциос, концертъёс, пумиськонъёс — ортчо. Кылсярысь, Ижысь Шор площадьын волонтёръёс мынӥсь-ветлӥсьёслы пичи куншетъёс люкыло. Нош ӝыт 18 часын но 30 минутэ #МЫВМЕСТЕ акция кутскоз — 50 метръем триколор площадь кузя вӧлскоз.
Тодады вайтон вылысь: кунмы та праздникез пусъе 1991-тӥ арысен. Куншетлы тӧдьы, лыз но горд буёлъёс юнме быръемын ӧй вал. Тӧдьыез возьматэ тупаса улонэз, чылкытлыкез. Лызэз — ог-огедлы осконэз. Гордэз — кужымез, кунмылэн эрикез понна кисьтэм вирез.
Куншетлэн нуналаз «Единая Россия» партия Атыкай музъемез гажанлы сӥзем акциос но мастер-классъёс ортчытӥз
Кылсярысь, огаз мастер-классын Ижысь реабилитацияя «Веста» центрысь пиналъёс мунёос лэсьтӥзы. Соосты бӧрысь спецоперацие келялозы — шуныт мылкыдын дасям киужъёс ожгарчиосмес мед утёзы. Мунёос огшорыесь ӧвӧл: бордазы песьтэрзы вань, со шаерысьтымы музъемен но ю тысен тырмытэмын.
Мастер-классэ пыриськисьёсты Флаглэн нуналэныз ӟечкылаз Кун Кенешысь депутат, Ожгарчиослэн семьяоссылэн комитетсылэн улос ёзэныз кивалтӥсь Елена Дербилова:
«22-тӥ август — огшоры нунал ӧвӧл, со эриклэн, эшъяськонлэн, ог-огдэ валанлэн праздникез. Со юрттэ кунысьтымы пӧртэм калыкъёслы тупаса улыны, ӵошен азьлань вамышъяны!» - пусйиз депутат.