Данъязы устооссэ дышетӥсьёсты

Туннэ Ижын данъязы устооссэ дышетӥсьёсты. Асьсэ куспазы вожвылъяськизы школаосысь педагогъёс, анай кылъя дышетӥсьёс, ватсаса тодон-валан сётон удысысь специалистъёс, техникумъёсысь но колледжъёсысь мастеръёс. Соосты ӟечкыланы вуизы Кун Кенешлэн Тӧроезлэн воштӥсез Татьяна Ишматова, Правительстволэн Тӧроезлэн воштӥсез Татьяна Чуракова, Удмуртиысь дышетонъя но наукая министр Светлана Болотникова, Кун Кенешысь ялан ужась комиссилэн кивалтӥсез, "Удмурт Кенеш" ассоциацилэн президентэз Андрей Ураськин, Дышетӥсьёслэн профсоюззылэн Удмуртиысь ёзэныз кивалтӥсь Владимир Векшин.
"Арлэн мастерез" конкурсын 5 мастеръёс финалэ потӥзы. Вормон басьтӥз Ижысь медициная колледжысь Елена Городилова.
"Анай кылъя но литературая устоез дышетӥсь" конкурс Россиын ортче 2-тӥ ползэ. Удмуртиын радъяськись этапаз кужымзэ мертаны мылкыд кариз 18 педагог. Финалозь вуиз 5 дышетӥсь. Вормиз К. Герд нимо гимназиысь покчи классъёсты дышетӥсь Наталья Воронова.
Ватсаса тодон-валан сётӥсь педагогъёс вожвылъяськизы "Сердце отдаю детям" конкурсын. Пӧртэм номинациосын кужымзэс мертаса, финалозь вуиз 9 мурт.
Вормисе потӥз усточи нылпиослэн юртазы ужась педагог Савелий Кузнецов.
Арлэн дышетӥсез луон понна нюръяськиз 22 мурт. 5 мурт финалозь вуиз. Вормон но дан вуиз Сарапулысь историяя дышетӥсьлы Филипп Мерзляковлы.
Вормисьёс Удмуртилэсь данзэ утёзы Россиысь педагогъёслэн вожвылъяськонъёсазы.
Конкурсэ пыриськисьёсты пӧртэм кузьымъёсын но дипломъёсын пусйизы.
Вормисьёслы Удмурт Правительство быдэн 100 сюрс манетлы сертификат висъяз.