Кун Кенешлэн кызь укмысэтӥ сессияз юнматэм куд-ог катъёс но пуктэтъёс сярысь

Владимир Невоструев кивалтэм улсын 24 шуркынмонэ Удмуртиысь Кун Кенешлэн кызь укмысэтӥ сессиезлэн нырысетӥ кенешонэз ортчиз. Депутатъёс 17 ужпумез эскеризы, 10-эз со - элькун катъёслэн ӵектосъёссы.
Кык лыдӟемен юнматэмын пенсионерлы улыны кулэ луись тужгес ичи коньдонлэн быдӟалаез сярысь элькун катэ воштонъёс. Соос Росси Федерациез 2023 арозь азинтонъя прогнозэ пыртэм тупатъянъёсын герӟаськемын. Элькун катэн пенсионерлы кулэ луись тужгес ичи коньдонлэн 2021 арлы быдӟалаез 8917 манет шуыса пусъемын. Та лыдпус пенсия вӧзы федерал ватсэт тырон понна кулэ.
Нырысетӥ лыдӟемен юнматэмын эмстрахования улосвыл фондлэн 2021 но вуоно 2022 но 2023 аръёслы коньдэтэз. Солэн табышъёсыз 22 млрд. 529 млн. манет чакламын. Со пӧлысь 21 млрд. 931 млн. манетэз эмстрахованияя федерал фондысь вуоз. Уже кутон люкетлэн быдӟалаез - 22 млрд. 531 млн. манет.
Быдэсак кутэмын «Удмурт Элькунысь Эскеронъя кун комитет сярысь» катэ воштонъёс. Соос Росси Федерацилэн Бюджет кодексаз но эскерись ёъёслэсь ужзэс радъян сярысь катаз пыртэм тупатъянъёсын герӟаськемын.
Кун Кенешлэн пуктэтэныз Элькунлэн вуоно аръёслы бюджетэз сярысь катъя шара лыдӟонъёслэн йылпумъянъёсын протоколзы юнматэмын. Тодады вайытом, кылзонъёс очной но заочной амалъёсын радъяськизы. Заочной люкетсы 3-сен 9-тӥ шуркынмонозь кыстӥськиз. Очной кылзонъёс 2020 арын 12 шуркынмонэ ортчизы. Отчы котькуд мылкыд карись мурт пыриськыны быгатӥз, кылзонъёслэн трансляцизы Кун Кенешлэн сайтаз мынӥз. Вуэм ӵектонъёс катӵектосэз кыкетӥ лыдӟонлы дасяку лыдэ басьтэмын луозы.
Кенешонын депутатъёс Кез ёросэз азинтон ужпумъёсты но эскеризы.
Кызь укмысэтӥ сессилэн кыкетӥ кенешонэз 2020 арын 15 толсуре ортчоз.