Удмуртиын «За заслуги в развитии парламентаризма» Данъян гадьпус кылдытэмын

Удмуртилэн кунлык басьтонэзлы 100 но Удмуртиысь Кун Кенешлы 25 ар тырмон улсын элькунамы выль данъет кылдытэмын. «Парламентаризмез азинтон понна» гадьпус чакламын каткылдытъян ужын кема аръёс ӵоже быгатыса ужам улосчиосмылы. Туннэ сессиын Владимир Невоструев нырысетӥ данъетъёсты сётӥз Удмуртиысь Вылӥ Кенешлэн 12-тӥ ӧтчамезлэн Тӧроезлы, Удмурт Элькунлэн Дано кунмуртэзлы Валентин Тубыловлы но Кун Кенешлэн вань куать ӧтчамъёсызлэн депутатсылы Софья Широбоковалы.
Владимир Невоструев соослэсь Удмуртилэсь катрадлыксэ кылдытонын бадӟым интызэс пусйиз.
Валентин Кузьмич Тубылов Удмуртиен кунамы бадӟымесь воштӥськонъёс ортчытон вакытэ кивалтӥз. Солэн кичӧлтэмезъя Вылӥ Кенеш элькунлэсь тодметпусъёссэ – кунпуссэ, куншетсэ но кункрезьзэ – юнматӥз. Вылӥ Кенешлэн 10, 11, 12 ӧтчамъёсаз бырйиськылӥз, Кун Кенешлэн 1 но 2 ӧтчамъёсызлэн депутатсы вал. 10 арлэсь кема кивалтӥз вань удмуртъёслэн «Удмурт кенеш» ассоциациенызы, али но солэн Дано Президентэз луэ.
Софья Широбокова 25 ар ӵоже ини Кун Кенешлэн депутатэз луэ. Со огназ гинэ вань куать ӧтчамъёсы бырйиськылӥз. Нырысетӥ ӧтчамын Кун Кенешлэн Тӧроезлэн воштӥсез вал. Кыкетӥысен витетӥ ӧтчамъёсын экономика политикая но коньдэтъя комиссиен кивалтӥз. Витетӥ ӧтчамын Кун Кенешлэн Тӧроезлэн воштӥсез луыса ужаз.