«Удмурт Элькунысь эскеронъя Кун комитет» сярысь катэ воштонъёс эскеремын

Кун Кенешлэн Тӧроезлэн воштӥсез Александр Прозоров 23 коньывуонэ кунэз лэсьтонъя, интыысь аскивалтонъя но кышкыттэмлыкъя ялан ужась комиссилэсь кенешонзэ ортчытӥз. Депутатъёс «Удмурт Элькунысь эскеронъя Кун комитет сярысь» катэ воштонъёсты эскеризы. Соос федерал катрадлыкез выльдэмен кылдӥзы.
Ӵектэмын таӵе воштонъёс:
- Комитетлэн тӧроезлы но солэн воштӥсьёсызлы кандидатъёс азе пуктӥськись куронъёс капчиятӥсько. Соос кун но муниципал кивалтон, кун но муниципал эскерон (аудит), экономика, коньдон бергатон но юриспруденция удысын 5 арлэсь ӧжыт ужамын луыны кулэ ӧвӧл (али 7).
- Комитетлэн тӧроезлэн воштӥсезлы но аудиторе кандидатъёсты ӵектыны быгато Удмуртиысь Кун Кенешлэн Тӧроез, эскеронъя Кун комитетлэн тӧроез, Кун Кенешысь ялан ужась комиссиос но депутат фракциос. Али сыӵе луонлыкез Комитетлэн тӧроезлэн гинэ вань.
- воштӥське Комитетлэсь Коллегизэ кылдытон но ужатон радлык.
Ӝегатскытэк палэнтэмез кулэ карись каттӥян учыръёсты шараяку, комитетлэн Тӧроез соос сярысь, Коллегиен кенешытэк, эрикрадэз утись ёзъёсы ивортыны быгатэ. Вазиськонъёсъя ужлэн мынэмез сярысь эрикрадэз утисьёс эскеронъя Кун Комитетэ ивортонъёс сётъяны кулэ.
Озьы ик катэ выль положение пыртыны ӵектэмын. Соя Комитет нуиськись ужез сярысь Кун Кенешлэн яке солэн ёзъёсызлэн куремзыя ивортон сётыны кулэ. Кызьы пусйиз Александр Прозоров, та воштонъёс депутатъёслэсь но комитетлэсь ужкусыпъёссэс матэгес карыны юрттозы.
Ялан ужась комиссилэн ёзчиосыз катлэсь ӵектоссэ умоен лыдъязы но сое Кун Кенешлэн коньывуонэ ортчоно сессияз эскерыны дэмлазы.