Елена Дербилова «Единая Россия» фракциен кивалтыны быръемын

Туннэ Кун Кенешысь «Единая Россия» фракцилэн кенешонэз ортчиз. Депутатъёс фракцилэн кивалтӥсезлэсь Анатолий Наумовлэсь ужоскетъёсызлэсь ас мылкыд каремезъя куштӥськон сярысь куриськонзэ эскеризы. Фракцилэн ёзчиосыз Анатолий Наумовлэсь куронзэ быдэстӥзы но со интые выль кивалтӥсез бырйизы. Та уже ӵектэмын вал кышкыттэмлыкъя, Регламентъя но Кун Кенешлэсь ужзэ радъянъя комиссилэн кивалтӥсезлэн Елена Дербиловалэн кандидатураез.
«Единая Россия» партилэн улосвыл политсоветэзлэн Президиумез дурбасьтэ Елена Дербиловалэн кандидатураез понна, - вераз партилэн улосвыл ёзэзлэн кивалтӥсез, Кун Кенешлэн Тӧроезлэн нырысетӥ воштӥсез Владимир Невоструев. Со кема аръёс ӵоже ужа ини партилэн Кун Кенешысь фракцияз. Малпасько, соин пайдалыко кивалтыны но быгатоз».
«Елена Анатольевна 10 ар ӵоже кивалтӥз «Единая Россия» фракцилэн серектариатэныз. Котькуд пуктэм ужпумез со дыраз но вылӥ ӟечлыкен быдэсъяз. Но фракциен кивалтон – огшоры уж ӧвӧл. Соин ик асьмеос ваньмы дэмен но огкылысь луыны кулэ», - ӵектэм кандидатура понна дурбасьтыса, вераз Кун Кенешлэн Тӧроез Алексей Прасолов.
Лушкем куара сётон пыр депутатъёс Елена Дербиловаез фракцилы кивалтӥсе бырйизы. Анатолий Наумов солы воштӥсе юнматэмын но сыӵе инлыкен Кун Кенешлэн Президиумаз пыртэмын.