Элькун парламентлэн витетӥ ӧтчамез берпуметӥ сессие люкаськылӥз

Кун Кенешысь 5-тӥ созывысь депутатъёс 6-тӥ июне берпуметӥ сессие люкаськылӥзы, эскеризы 33 юанэз. Коньывуон толэзе ортчоно сессиын ужалозы ни выль быръем депутатъёс.
Депутатъёс эскеризы 2016-тӥ арын элькун бюджетлэсь кутӥськемзэ, чаклазы, кыӵе удысъёслы 2017-тӥ-2018-тӥ аръёсы саклык висъяно.
Миым бюджетлэн доход люкетэз 63 миллиард 90 миллион манет люкаськиз. 2015-тӥ арен ӵошатоно ке, со 13 процентлы уногес. Коньдон ужпумъёсъя министрлэсь огдыре ужзэ быдэсъясь Вера Сухих верамъя, та герӟаськемын бадӟымесь предприятиослэсь выт вуэмен, акцизъёслы дун будэмен. Бюджетлэн расход люкетысьтыз 8 миллиард пала кошкиз банкъёс азьын азьвыл люкам кредитъёсты тырыны но сюресъёсты тупатонлы. Муниципал кылдытэтъёслэсь ужзэс радъян, бюджетсэс тупатон вылысь висъямын 26,5 миллиард манет. Бадӟым саклык висъяськиз дышетон, эмъян, калыкез улон-вылонын утён удысъёслы. Кылсярысь, бюджет удысын ужасьёслы уждун тыронлы гинэ расход люкетысь 38 процентэз кошкиз. Со сяна, шаерамы усьтыны пӧрмиз 2 нылпи сад. Ижын ӝутӥськиз 825 интылы школа. Та луонлык сётӥз 3-сен 7 аресозь вань нылпиосты садэ интыяны, 85 процентсэ пиналъёсты 1 сменаен дышетонэ выжтыны. 900 миллион манет висъяськиз нылпи юртъёсын сирота нылпиосты сюдон-вордонлы. Гуртъёсын фермаосты ӝутонлы, пудо вордонэз азинтонлы кошкиз ог 1 миллиард 500 сюрс манет. Таин валче луонлык кылдӥз 11 сюрслэсь трос скал возён инты лэсьтыны. Будосъёсын вырисьёслы но юрттэт сётӥськиз — 520 миллион манет.
Вера Сухих верамъя, бюджетлэсь расход люкетсэ йылтытэк одно быдэстоно ужпумъёсты быдэстон понна сюлмаськизы, интыен-интыен уксёез шыръяны тыршизы.
Депутатъёс пусъемъя, лыдпусъёс котькыӵе умоесь мед луозы, калыклэн йыр висёнэз сярысь вунэтыны уг яра. Миым шаерамы кирпич поттӥсь 3 завод пытсаськиз. Пыдлось гуртъёсы пыдын сяна уд сюры — тросэз автобус рейсъёс ворсаськизы, гуртоослэн больницае гинэ но мынэмзы уг луы. Та ужпум борды басьтӥськыны дыр вуэмын.
Кун Кенешысь Бюджетъя, вытъя но коньдон ужпумъёсъя ялан ужась комиссиен кивалтӥсь Софья Широбокова верамъя, берло дыре адямиослэн доходзы усиз. Соин ик азьланяз уждунъёсты будэтон сярысь сюлмаськоно.
2017-тӥ арын бюджетлэсь доход но расход люкетсэ 1 миллион 15 сюрс манетлы будэтыны чакламын. Таӵе луонлык кылдӥз федерал бюджетысь коньдон вуэмен. Озьы куашкан калэ вуэм коркаосысь адямиосты выль квартираосы выжтон понна туэ 697 миллион манет ватсаськиз на. Энергетикая, ЖКХ-я но тарифъёсты кун ласянь радъянъя министерстволэн ужаз воштонъёс кылдӥзы: 32 миллион манет табере висъяськоз трос квартираем юртъёсын капитальной ремонт лэсьтонлы, лифтъёсты воштонлы. Озьы ик Тазалыкез утёнъя министерстволэн ужаз воштонъёс вань, кылсярысь, табере 12 миллион манет висъяськоз шер пумиськылӥсь висёнъёсты эмъяны препаратъёс дунтэк басьтонлы. Оглом учконо ке, туэ бюджетлэн доход люкетэз 63 миллиард 934 миллион манет, расход люкетэз 67 миллиард 894 миллион манет, дефицит люкетэз 3 миллиард 960 миллион манет луоз. Депутатъёс та воштонъёс понна куаразэс сётӥзы.
Депутатъёс пусъемъя, лыдпусъёс котькыӵе умоесь мед луозы, калыклэн йыр висёнэз сярысь вунэтыны уг яра.
Нимысьтыз саклык висъяськиз Удмуртиысь Медицинаын страхованиея (ОМС) фондлэсь 2016-тӥ ар понна бюджетсэ эскеронлы. Фондлэн бюджетысьтыз доход люкетэз 14 миллиард 703 миллион манет люкаськиз. Расход люкетэз 14 миллиард 682 миллион манет луиз. Фондэн кивалтӥсь Сергей Шадрин верамъя, страхованиея ужа 117 больница. Таос пӧлысь 29-эз — частной клиникаос. Фондлэн бюджетысьтыз уксё 263 сюрс 813 муртэ эмъяны кошкиз. Медицинаын вылӥ технологиосты кутыса, 4 сюрс 153 муртлы юрттэт сётӥськиз. Талы 590 миллион манет висъямын вал. Зэм, Софья Широбокова пусъемъя, берлоез ласянь лябгес ужаськомы. Угось асьме дорын юрттэт басьтыны быгатӥсьёс но, республикамылэн палэназ кошкыса, эмъясько. Соин ик фондэз куремын Тазалыкез утёнъя министерствоен валче та ужпум борды басьтӥськыны.
Сергей Шадрин пусъемъя, дневной стационарын эмъяськыны ОМС чотын быгатӥз 88 сюрс 565 мурт. Со сяна, 69 сюрс 642 висисьлы операция лэсьтэмын. Оглом котькуд страховать карем адямилы программая 916 манет висъяськиз, со Россиысь улосвылъёслы юнматэм куронъёслы тупа, 100 процент луэ.
Кун Кенешлэн Тӧроез Владимир Невоструев верамъя, 5-тӥ созывысь депутатъёс экономика, калыкез улон-вылонын утён удысъёсты азинтон вылысь туж кулэ луись 450-лэсь трос законъёс кутӥзы. Созыв секыт кризис вакытэ ужаз, бюджетэ воштонъёс пыртылӥз, улонысь воштӥськонъёсъя тупатскылӥз, законопроектъёс кылдытъяз. Со дыре ик Кун Кенеш кадръёслы кебит но луэ. Уноез депутатъёс шаерысьтымы валтӥсь предприятиосын, гурт поселениосын кивалто. Ортчытэмын вал 39 сессия. Шаерамы огсыр улонэз азинтыны быгатӥмы, калыклэсь мылкыдъёссэ кылыса, ужаны тыршимы, шуиз Владимир Невоструев. Вуоно созывлы ӟеч инъет кылдытэмын. Депутатъёслы ужамзы понна тау кариз Удмуртилэн Тӧроезлэсь ужзэ быдэсъясь Александр Бречалов. Депутатъёслэн ӵектонъёссы, законопроектъёссы шаермес азинтонъя картае пырозы, шуиз со. Осконзэ вераз, туннэ ужась депутатъёслэсь мытэм ужъёссэс вуоно созывын выль депутатъёс мыло-кыдо азинтозы шуыса.
Кун Кенеше быръёнъёс ортчозы 10-тӥ сентябре. Выль созывын табере ужалоз 60 депутат. Соку ик быръёмы Удмуртилэсь Тӧрозэ. Владимир Невоструев верамъя, унояз партиос быръёнъёслы дасяськыны кутскизы ни. Соин ик гужем кезьыт ке но, ӟырдыт луоз, журналистъёслы шуиз Владимир Невоструев.