Удмуртилэн Кун Кенешысьтыз депутатъёс парламентлэсь сессизэ Ту-154 самолётын быремъёсты буре ваёнэн кутскизы
26.12.2016
Туннэ, 26- тӥ толсуре, Владимир Невоструев кивалтэм улсын Кун Кенешлэн сессиез усьтӥськиз. Депутатъёс парламентлэсь сессизэ Ту-154 самолётын быремъёсты буре ваёнэн кутскизы.
«Толон Сочи вӧзын Ту-154 самолёт усиз. Авиакатастрофаын 92 адями быриз. Соос пӧлын Удмуртиын вордскем Радик Закиров, со Ижкарысь искусствоосъя 2 номеро школаез йылпумъяз. Кырӟанъя но эктонъя Александров нимо академ ансамблен ӵош со Сирие, асьме ожгарчиосты вуись Выль арен ӟечкыланы лобе вал. Быръемъёс пумысен кайгырыса но ӵыжы-выжыоссылы но матысь адямиоссылы куректэмез вераса, Россилэн азьмуртэз Владимир Владимирович Путин аслаз пуктэтэныз 26-тӥ толсурез йӧскалык кайгырон нуналэн ялӥз. Со кышкыт учырын быремъёсты минут ӵоже чус улыса буре вайыны ӵектӥсько», — пусйиз Удмуртиысь Кун Кенешлэн Тӧроез Владимир Невоструев.