«Удмурт кенеш» огазеяськон сярысь котырес ӝӧк сьӧрын кенешизы

Кун Кенешысь Национальной политикая, кышкытлыклэсь утиськонъя но Кун Кенешлэсь ужзэ радъянъя ялан ужась ӧрилэн кичӧлтэмезъя ортчиз «Удмурт Кенеш» огазеяськонлэн национальной политикаез улонэ пыӵатонын интыез» котырес ӝӧк. Со сӥземын вал удмурт огазеяськонлы 25 ар тырмонлы.
Ӝӧк сьӧры люкаськизы шаерысьтымы пӧртэм национально-культурной огазеяськонъёслэн кивалтӥсьёссы, депутатъёс, тодосчиос, иворчиос. Вераськонэз нуиз ялан ужась ӧрилэн кивалтӥсез Энвиль Касимов.
«Удмурт Кенеш» огазеяськонлэн вице-президентэз Владимир Байметов вакчияк тодматӥз удмурт движенилэн историеныз. Со вераз, удмуртъёслэн но трос мукет выжы калыкъёслэн но, асваланзы сайканы ӧдъяз революция бере. Ортчылӥзы съездъёс, саклык висъяськыны кутскиз калыкез дышетонлы, национальной интеллигенция будэтонлы. 1990-тӥ аръёс бере кылдӥз «Удмурт Кенеш». Туннэ югдур ӟечгес, выжы калыкъёслэсь кылзэс, культуразэс утён сярысь валан вань кивалтӥсьёс ласянь, но, котьма ке но, туж тросэз возиське общественной огазеяськонъёс вылын, та ласянь «Удмурт Кенеш» шаерысьтымы одӥгез валтӥсез луэ. Сое ик пусйизы мукет калык огазеяськонъёслэн кивалтӥсьёссы но.
Удмуртиын 180 национально-культурной огазеяськонъёс лыдъясько, куспазы соос ваньзы тупаса уло.
Энвиль Касимов пусйиз, туэ Кун Кенешын нош ик эскерозы кун кылъёс сярысь законэ воштонъёс пыртон пумысен «Удмурт Кенешлэсь» ӵектонзэ — отын вераськон уг мыны удмурт кыл сярысь гинэ, выль кат утьыны кулэ шаерысьтымы вань калыкъёслэсь анай кылзэс.
«Сое одно ик кутыны кулэ. Вераськон уг мыны шаерысьтымы вань калыкез удмурт кыллы дышетон сярысь, но кинлэн потэ анай кылзэ дышетэмез, одно луонлыкъёс сётоно — со государстволэн сюлмаськонэз», - шуиз ялан ужась ӧрилэн кивалтӥсез.
Кылсярысь, Удмуртиын матысь аръёслы Дышетонэз азинтонъя программаын одӥг чурен но пусъемын ӧвӧл этнокомпонентъя дышетон. Ог-огед сярысь тодытэк, мукетъёссэ уд вала, эшъяськыны быгатон озьы гинэ уг сётӥськы, шуизы котырес ӝӧке пыриськисьёс.
«Удмурт Кенеш» огазеяськонлэн кивалтӥсез Татьяна Ишматова вань огазеяськонъёслэсь кивалтӥсьёссэс ӧтиз «Удмурт Кенешлэсь» юбилейзэ валче пусйыны.
«Куд-огез уг вала, мар со национальной политика, малпало, со кылэз дышетон, сямъёсты-йылолъёсты утён, но со озьы гинэ ӧвӧл. Национальной политика — котькуд удысын. Котькӧня асьмеос йӧл мед кыском, курегпуз мед поттом, но куспамы тупаса улыны ке ӧм быгатэ, номыр со кулэ но уз луы ни. Соин ик валтӥсез — ог-огдэ гажан но азинскыны луонлыкъёс кылдытон», - йылпумъяса вераз Энвиль Касимов.