Владимир Невоструев: Мон быръёнъёсты одӥг пол но ӧй кельты

Туннэ Россиысь Кун Думае быръёнъёс ортчо. Удмуртиысь Кун Кенешлэн Тӧроез Владимир Невоструев куара сётӥз Ижкарысь 93 номеро школаын интыяськем 5/20 номеро быръён участокын. Кивалтӥсьлэн верамезъя, со быръёнъёсты одӥг пол но ӧз кельтылы.
«Зэм верало, мон одӥг пол но ӧй кельты быръёнъёсты , котьку мынӥсько но азьланез понна куараме сётӥсько», — вераз Владимир Невоструев.
Удмуртиысь Кун Кенешлэн Тӧроез ваньзэсты праздникен — Куара сётонъя огъя нуналэн ӟечкылаз но элькунын улӥсьёсты быръёнъёсы пыриськыны ӧтиз. Улосвылын сыӵе эрикрадзы вань 1 миллион 200 сюрс пала адямилэн.
Нялтас вераса, ужъюртъёсын, кытын куара сётон радъямын, пыжиськемъёс, канцеляр вузъёс, пӧртэм книгаос басьтыны луэ. Но улосвыл парламентлэн кивалтӥсез пыжиськемъёсты ӧз басьты, валэктӥз, кутэмняньёс сое дораз возьмало шуыса — кузпалыз пыжиз. Владимир Невоструевлэн кылъёсызъя, быръёнъёсты ческыт ӝытсиёнэн пусъён семьялэн йылолэз луиз.