Удмуртиысь эмъяськонниосы ӝог эмъюрттэт сётонъя 18 выль автомобильёс вуизы

Ӝог эмъюрттэт сётонъя 18 выль автомобильёс вуизы Удмуртиысь эмъюртъёсы. Ёрос но кар эмъяськонниослэн кивалтӥсьёссылы усьтонъёсты 15-тӥ куарусёнэ сётӥз улосвыллэн тӧроез Александр Соловьёв. Та ужрадэ Кун Кенешлэн Тӧроез Владимир Невоструев но пыриськиз.
«Ми азьын ужпум сылэ — матысь аръёсы 185 автомобильёсты воштыны. Ми со лыдпуслы матын ни. 2016-тӥ арын ми 100 пала машинаосты воштомы. Туннэ эшшо 18 машинаослэсь усьтонъёссэс сётӥськомы, со понна тау ӟечен юрттэтъя «САФМАР» фондлы, со элькун автопаркез тырмытонэ мыло-кыдо пыриськиз. 2017-тӥ арын автопаркез ӝог эмъюрттэт сётонъя эшшо 85 автомобильёсын тырмытыны чакласькомы», — вераз элькун тӧро Александр Соловьев.
Коньывуон пумозь Удмуртиысь эмъюртъёс ӝог эмъюрттэт сётонъя 100 выль автомобильёс басьтозы, со автопаркез ог 40 процентлы выльдыны луонлык сётоз. Элькунысь тазалыкез утёнъя министр Алексей Чуршин верамъя, 16 машинаос вуозы куарусён пумозь, коньывуонэ эшшо 18 выль автомобильёсты эмчиослы сётыны малпало.