Кун Кенешысь ЛДПР фракцилэн кивалтӥсез журналистъёсын пумиськиз

Тимур Ягафаров фракциен кылем ар пумысен кивалтэ. Иворчиосын та солэн нырысетӥ пумиськонэз луиз. Фракциен кивалтӥсь пусйиз, ЛДПР-ысь депутатъёслэн тыршемзылэн емышез — со анай-атайтэк кылем нылпиослы улон инты висъянэз ӝогомытон. Туэ та ужъёслы элькун бюджетын 60 миллион манет чакламын.
— Элькунысь министерствоосын юн кусып возьыса, депутатъёсмы ужамзэс сак чаклало. Котькуд отчётэз пыр-поч сэрттӥськом-пертчиськом. Удмуртиысь быдэсъясь кивалтэтлэн ужез яра ӧй шуысал. Али ӵектонъёсмес дасяськом, — шуиз фракциен кивалтӥсь. — Золгес ужано федеральной программаосы пырон понна. Соос чотын шаерлэн бюджетаз ватсаса коньдон вуыны быгатоз.
Кылем арын партия 12 нылпи площадка басьтӥз. Туэ гужем ни выль снаряжение Ижкарысь ёросъёсын интызэ шедьтоз. Партилэн общественной приёмнояз калык пӧртэм юанъёсын мыло-кыдо лыктэ. 2015-тӥ ар ӵоже 255-лэсь трос вазиськонъёс учкемын. Туэ со лыдпус 100 пала вуэ ни. Куартолэзе Удмуртие кык пол вуылӥз ЛДПР-лэн агитпоездэз. Депутатъёс, юристъёс но активистъёс калыкен Ижкар, Люкшудья, Азино, Ува, Балезино, Яр но Глазов станциосын пумиськизы.
Кун Кенешлэсь матысь сессияез сярысь вераса, депутат пусйиз:
— Вытъёсын герӟаськем законъёсты али учконо. Тросэз коньдон федерал бюджетэ кошке. Ми малпаськом, 60 процентэзлэсь ичиез Удмуртие кыльыны кулэ ӧвӧл. Соку вань малпанъёсмес быдэстыны быгатом.
Кун Думае но муниципал кылдытэтъёсы сӥзьыл ортчоно быръёнъёсын ЛДПР 15-20 процент куара люканы малпа. Тимур Ягафаров умоен вераз «Огъя Россия» партилэн ортчем праймеризэс сярысь. Ӝоген Удмуртиысь ЛДПР-лэн конференциез. Отын быръем муртъёс гужем Москвае ЛДПР-лэн съездаз мынозы.
Сӥзьыл быръёнъёсы партия таӵе малпаськонъёсын мынэ: тужгес но пичи уждунэз 20 сюрсозь будэтоно, ужбергатӥсьёсты 2 арлы налогъёслэсь мӧзмытоно, пенсионеръёслэсь, трос нылпиё семьяослэсь кун азьын пунэмъёссэс быдтоно.