Удмуртиысь Кун Кенешын улон интылы кулэяськисьёслы музъемез дунтэк сётыны ӵекто улон интызыя гинэ

Улон интылы кулэяськисьёс Удмуртиын музъемез дунтэк басьтыны кулэ улон интызыя гинэ. Кин улон интыен югдурзэ ас мылкыдызъя уродгес кариз, соос дунтэк музъем басьтыны куриськонэз 5 ар ӵоже сётыны уз быгатэ. Элькун катрадлыке сыӵе воштонъёс пыртыны ӵектонэн 2-тӥ инвожое потӥзы Дэри ёросысь тӧрлыкъёс.
Удмуртиын кун яке муниципал асъетысь музъемез калыклы дунтэк сётон сярысь катэ воштонъёс пыртон сярысь катӵектосэн тодматӥз Дэри ёрос администрациысь ваньбуретъя, но музъем узырлыкъёсъя управленилэн кивалтӥсезлэн воштӥсез Жанна Бектина. Ӵектосэз эскеризы элькун парламентысь агропром огъетъя, музъем кусыпъёсъя, инкуазь узырлыкез уже кутонъя но инкуазез утёнъя ялан ужась ӧрилэн кенешоназ.
«Ӵектэмын катлэн 2-тӥ но 3-тӥ ёзэтаз воштонъёс пыртыны, дунтэк музъем басьтон сярысь куриськонэз адями аслаз улон интыезъя гинэ сётыны мед быгатоз. Озьы со адями черодын сылоз улон интыезъя муниципал кылдытэтын гинэ. Со интыысь тӧрлыкъёслы ас кожазы ужаны луонлык сётоз, угось соос интыын улӥсьёслэн тунсыкъёссыя ужпумъёсты сэрттыны-пертчыны кулэ», — вераз со.
Жанна Бектиналэн верамезъя, али Дэри ёросын дунтэк музъем басьтыны мылкыд карисьёслэн черодазы сылӥсь 40 процентлэсь уноез кунмуртъёс со ёросын улӥсьёс уг луо. Со дыре ик интыысь коньдэтэз тырмыто отын улӥсьёс гинэ, мукет муниципал кылдытэтъёсын улӥсьёс вытъёсты мукет муниципалитетлэн коньдэтаз тыро. Озьы Дэри ёросысь гурт поселениос пумисько сыӵе учыръёсын, куке адямиослы дунтэк музъем сётэмын, но отчы инженер но мер инфраструктураез вуттыны луонлыкъёс ӧвӧл, соин валче калыкын тулкымъяськонъёс кылдо. Соин ик, Жанна Бектиналэн верамезъя, катэ воштонъёс пыртыны кулэ.
Озьы ик муниципалитет дунтэк музъем курись семьялэн ёзчиосыз пумысен валатонэз воштыны ӵектэ. Кузпалъёс коть одӥг, коть пӧртэм интыын пусъемын мед луозы, ваньбуръя югдурзы валче вылысь эскериськоз. Али ужась катъя кузпалъёс ог-огзы понна семьялэн ёзчиосыз луо соос одӥг улон интыын пусъемын ке. Озьы луыло учыръёс, куке адями дунтэк музъем басьтэ, нош мукет интыын пусъем кузпалызлэн вань ни корка пуктыны ярамон музъемез яке солэн улон интыя югдурзэ умоятыны кулэлыкез ӧвӧл.
Удмуртиысь ваньбурет кусыпъёсъя министр Рустэм Зайнуллин верамъя, солэн удысэтэз тросэзлы ӵектэм воштонъёслы дурбасьтэ.
«Валтӥсез та катӵектосын — улон инты сярысь положение. Россиысь тросаз улосвылъёсын со вань, музъем сёто со интыын, со муниципал кылдытэтын гинэ, кытын тон улӥськод. Музъемлы куриськон сётэмын ни ке, катэз со вылэ но вӧлмытоно, сыӵе милям малпанмы», — вераз министр.
Удмуртиысь Кун Кенешысь агропром огъетъя, музъем кусыпъёсъя, инкуазь узырлыкез уже тонъя но инкуазез утёнъя ялан ужась ӧрилэн кивалтӥсез Владимир Варламов вераз, та ужпум парламентлэн Дэри ёросын ортчытэм кенешоназ эскеремын вал шуыса.
«Ми сессие потомы, нырысетӥ лыдӟонын сое кутӥмы ке, собере тупатонъёсты пыртомы. Ми али сое эскериськомы, вуоно арлы йылаз-пумаз вуттомы», — вераз со.
Катӵектосэз 21-тӥ инвожое ортчоно сессие поттыны вераськизы.
Депутатъёс озьы ик эскеризы гуртысь предприятиослы кулэ луись ӧнерчиослы пичи бырись гуртъёсын улон корка пуктон улэ дунтэк музъем висъян ужпумез.