Удмурт литератураез азинтон амалъёс сярысь вераськизы Кун Кенешын котырес ӝӧк сьӧрын

21-тӥ даурын удмурт литератураез азинтон амалъёс сярысь вераськизы котырес ӝӧк сьӧрын. Йӧскалык прозалэн но кылбуретлэн туннэез но ӵуказеез пумысен пӧртэм малпанъёс чузъяськизы. Ужрад ортчиз 20-тӥ оштолэзе Удмуртиысь Кун Кенешын.
Кызьы вераз пумиськонэз нуись Энвиль Касимов, парламентысь йӧскалык политикая, мерлык кышкыттэмлыкъя, регламентъя но ужез радъянъя ялан ужась ӧрилэн кивалтӥсез, Удмуртилэн лулчеберетъя картаез тунсыко но пӧртэмлыко, но со дыре ик туж люкиськемын. Соин ик литературая пӧртэм «шормуӵъёсты», озьы ик соосты, лыдӟисьёсты но тӧрлыкъёсты герӟась амалъёс шедьтыны кулэ.
«Литература адямиез возьматэ. Асьмеос пумиськимы лэчыт юанъёслы валэктонъёс шедьтон понна но — кызьы ми возьматӥськомы адямилэсь улонзэ. Литературатэк улыны уг луы. Со история сямен ик вал, вань но луоз. Татчы люкаськизы лулчеберетлэн со ӧраз улӥсь ӧнерчиос. Возьмасько тунсыко вераськонэз но ужпумъя пӧртэм малпанъёсты», — вераз Историяя, кылъя но литературая Удмурт институтлэн кивалтӥсез, Удмуртиысь Калыкъёслэн ассамблеязылэн тӧроез Алексей Загребин.
Удмурт литератураын пӧртэм ласянь но кужмогес азинске кылбурет, лыдъя Историяя, кылъя но литературая Удмурт институтысь ӧнерчи Алексей Арзамазов. Солэн верамезъя, отын пӧртэм арлыдъем гожъясьёс асьсэдыз возьмато, егитъёс кык кылын ужаны тыршо. Озьы ик егит гожъясьёс пӧлын тросгес луо нылкышноос.
Егитъёслы бадӟымгес саклык висъяно шуыса пусйиз Удмуртиысь гожъясьёслэн огазеяськонзылэн тӧроез Пётр Захаров но. Сотэк соос ас ужъёссэс поттыны коньдон утчано луо пырак кунгож сьӧрын но. Со тодэ вайытӥз, уноез классикъёс тросгес гожъяськизы ӵапак егит дыръязы.
Котырес ӝӧклэн ужаз пыриськизы Удмуртиысь Кун Кенешысь депутатъёс, Печатья но калыке ивортодэт вӧлмытонъя агентствоысь, вылӥ дышетсконниосысь, Удмуртиысь гожъясьёслэн огазеяськонысьтызы ыстэм муртъёс, гожъясьёс, литератураез эскерисьёс, элькунысь егитъёслэн парламентсылэн ёзчиосыз, иворъёсты вӧлмытӥсьёс.
Люкаськемъёс удмурт литератураез азинтонын умой амалъёсты пусйизы. Кылсярысь, ёросъёсын кылбуретъя слэмъёс ортчытъян, «Удмурт дунне» газет бордын литературая студия кылдытон. Озьы ик огкылэ вуизы, Литераторъёслэсь элькун юртсэс кылдытон сярысь малпанэз улонэ пыӵатоно Йӧскалык лыдӟиськонниез выльдон улсын.