Луоз-а Дэри ёрос шоркар бордын?

Кун Кенешын Бюджетъя, вытъёсъя но коньдон ужпумъёсъя ялан ужась комиссилэн кенешонэз ортчиз. Солэн уженыз кивалтӥз элькун парламентлэн тӧроезлэн воштӥсез, комиссилэн кивалтӥсез Софья Широбокова. Депутатъёс эскеризы Дэри ёросэн герӟаськем ужпумез.
2014-тӥ арлэн пумаз Дэри ёросысь кивалтӥсьёс вазиськизы Удмурт Элькунлэн Тӧроезлы Александр Соловьевлы, Дэри ёрослы шоркар бордысь ёрослэсь статуссэ сётыны курыса. Озьы тросгес луонлыкъёс кылдысалзы ёросэз азинтыны но ӝутыны. Та ёрос Ижлы туж матын бере, уноез отчы пуктӥськыны мылкыд каре. Шутэтскон нуналъёсы ёросысь калыклэн лыдыз 3-4 поллы йылэ. Уногес адями ворттылэ сюресъёссы вылтӥ, тросгес кужым кулэ тылпулэсь но утиськыны, порядокез но радъяны. Ёрослэн бюджетэз тае уг вормы ни.
Ялан ужась комиссие пырисьёсты Дэри ёрослэн йырыз Андрей Коняшин тодматӥз ёрос азьын сылӥсь ужпумъёсын. Депутатъёс соосты эскерыса потӥзы, ӟечен пусйизы. Но коньдон ужпумъёсъя министр Станислав Евдокимов вань лыдпусъёсын соглаш кариськыны ӧз дырты: Дэри ёрослы юрттонъя программаез рос-прос эскерыса потоно, котькуд лыдпусэз пыр-поч чаклано. Соин валче Дэри ёросэн герӟаськем ужпум эскериськоз Кун Кенешлэн вуоно сессияз 29-тӥ южтолэезе. Ёрослы юрттэт висъяны чакламын вуоно арысен.