Вуоно арын бадӟым саклык висъяськоз гурт удыслы

2016-тӥ арын шаерысьтымы гурт удысэз азинтон понна висъяны чакламын 1 миллиард 303 миллион 49 сюрс манет. Та пӧлысь 120 миллион манетэз мыноз ӟеч выжыысь пудо басьтыны, фермаос ӝутыны, йӧл кысконэз йылэтыны. Хозяйствоослы юрттэт вуоз на федерал бюджетысь но.
Россилэн Президентэз Владимир Путин Федерал Собранилы вазиськоназ шуиз: 2020-тӥ арозь асьмеос ӝажыосмес тырмытыны кулэ асьме сиён-юонэн. Туннэ миллион гектаръёсын бусыос пашмо. Пӧрмостэм кузёослэсь музъемзэс талано но гурт ужен рос-прос вырись адямиослы сётоно. Та законэз Кун Думаысь депутатъёс юнматыны кулэ ни вуоно арын сӥзьыл.
— Азьтэм кузёлэсь музъемзэ талан понна судъёстӥ бызьылоно, — шуэ Кун Кенешысь Гурт удысъя, музъем кусыпъёсъя но инкуазез утёнъя ялан ужась комиссилэн кивалтӥсез Владимир Варламов. — Али бусыез 3 арлэсь кема гырытэк-кизьытэк возись мурт вылэ гинэ судэ сётыны луэ. Но кесэгзэ соку ик басьтыны нокызьы уз луы. Тупатскыны дыр сётозы на, штраф тырытозы. Кун Думае та аръёс ӵоже 2 пол вазиськылӥм ни, бусыез басьтон понна 3 ар витёно ӧвӧл шуыса. 2 ар ӵоже ик адӟиськоз ни, музъем вылаз кузёез маке будэтыны малпа я уг.
Владимир Сергеевич лыдъя: кутскись фермеръёслы грант люкылыку но, туж чаклано, ужез пӧрмоз-а шуыса. Куд-огез уго бусыез ас вылаз гожтэ, уксё басьтэ но — музъемзэ но аналтэ, пудоезлэсь лыдзэ но уг йылты. Грант висъяно скал гидъёссэ паськытатыны малпась муртлы гинэ. Уката ик 2020-тӥ арозь шаерамы арлы быдэ 1 миллион тонна йӧл кыскыны кулэ. Отчыозь ог 220 сюрс тонна уг тырмы на. Озьыен, юрттоно скал уллё возисьёслы.
— Асьмемыз асьмеос сюдыны быгатон национальной идеялы мед пӧрмоз, — веранзэ азьланьтэ Владимир Варламов. — Нош туннэ техника гинэ ӧвӧл, технологиосты но кунгож сьӧрысь кутӥськомы. Зэм, машинаоссы визьмын лэсьтэмын: кондиционерез вань, быдэсак сямен ужа электрон амалэн, кнопка зӥбылонэз гинэ кыле на, пудо сиён но умой дася. Но туннэ Кировын но умой трактор поттыны быгато ни. Елабугаын мотор лэсьтонъя завод ужа. Глазовын потто ӟеч сеялка. Кунгож сьӧры учкылытозь, асьме заводъёсты дунъяны дыр вуэмын.
Зэм, специалистъёсыд ӧз луэ ке, трос йӧл уд кыскы. Туннэ вань кужымез пононо гуртэ егит кадръёсты кыскон понна. Юрт пуктыны субсидия висъяно соослы гинэ, кинлэн нокыӵе липетэз но ӧвӧл. Асьмелэн куддыр озьы луэ: специалистлэн квартираез городын вань ни, нош со эшшо музъем куре на, пуктӥське но хозяйствоысь кошке, юртсэ вуза. Субсидиослэсь быдӟалазэс будэтон сярысь но сюлмаськоно. Соцобъектъёсты ӝутонэз но вунэтоно ӧвӧл. Вавож ёросысь «Колос» хозяйствоен кивалтӥсь Владимир Красильников та ласянь ужаны пӧрмытэ ук. Гуртсэ кыӵе-кыӵе ӝутӥз ни! Хозяйство гидъёс но бусыос сярысь гинэ сюлмаськиз ке, кин гуртэ кылёз? — шуэ Владимир Варламов.