Депутатъёс калыкен пумиськизы

Росси Конституцилэсь нуналзэ пусъён улсын кунамы 14-тӥ толсуре ортчиз кун ёзъёсын калыкез пумитан нунал. Та нуналэ ик Кун Кенешысь депутатъёс но калыкен пумиськизы. Ужрадэ пыриськизы Кун Кенешысь ялан ужась комиссиослэн кивалтӥсьёссы Светлана Кривилёва, Валерий Бузилов, Наталья Кузнецова но Наталья Сударикова. Парламентысь депутатъёс доры ог 20 мурт вазиськиз. Соослэн уноез юанъёссы герӟаськемын вал улон интыен. Калык тунсыкъяськиз: кыӵе луонлыкъёс кылдытэмын шаерысьтымы егит дышетӥсьёслы капчиятэм амалъя квартира басьтыны, кызьы радъяське Быдӟым ожысь ветеранъёслэсь улон условиоссэс ӟечомытон, кыӵе программаос быдэсъясько элькунамы егит семьяослы сэреген юрттонъя но мукет. Со сяна, трос юанъёс люкаськемын жилищно-коммунальной хозяйство ласянь: адямиос ӝожтӥсько управляющей компаниослэн пӧяськемзы вылэ, озьы ик тунсыкъясько капремонтъя программалэн быдэсъяськеменыз.
Калыкез сюлмаськытэ тазалыкез утён удыс но. Светлана Кривилёвалы пӧртэм юанъёсын вазиськизы: адямилэн дуно операция лэсьтыны луонлыкез ӧвӧл ке, юрттэт курыны луоз-а кунлэсь, та учырын бюджетын юрттэт чакламын-а? Светлана Петровналы озьы ик вазиськизы Ижысь но Сарапулысь больницаосын тыршисьёс: висисьёслы интыосты кулэсто, таин валче эмъясьёс ужтэк кылёзы. Депутат валэктӥз: тазалыкез утён удысын лэчыт ужпумъёс туннэ нуналлы лачак люкаськемын, соос сэрттытэк-пертчытэк кельтэмын уз луэ.
Та нуналэ вазиськонъёс ваньмыз пусйыса кельтэмын но депутатъёслы нимаз удысъёсъя люкылэмын.