«Единая Россия» партилэн Удмурт ёзэз ужезлы йылпумъянъёс лэсьтӥз

«Единая Россия» партилэн Удмурт ёзэзлэн 26-тӥ конференциезлэн нырысетӥ люкетэз ортчиз. Ужрадэ пыриськизы Удмурт Республикалэн Тӧроез, партилэн Удмурт ёзэзлэн Политсоветэзлэн секретарез Александр Соловьёв, Кун Кенешлэн Тӧроез Владимир Невоструев, «Единая Россия» партилэн ЦИК-езлэн Приволжск федерал округен кусып возёнъя департаментэзлэн советникез Константин Главатских, партилэн бурд улаз пырись «Егит гвардия» огазеяськонлэн ёзчиосыз, озьы ик пӧртэм ёросъёсысь вуэм 221 делегатъёс.
Йылпумъянъёс лэсьтэмын партилэн Удмурт ёзэзлэн туэ ар понна тыршемезлы. Пыӵазы пӧртэм пумо проектъёс. Кылдӥзы выльёсыз но, кылсярысь, «Ижысь сюресъёс» проект — со улсын тупатъямын шоркарысь сюресъёс, азбаръёс.
Конференцилэн шорсюлмыз луиз партилэн Удмурт ёзэзлэн секретарезлэн Александр Соловьёвлэн вазиськонэз:
— Партийной ужын вань кужымдэ поныса ӧд тыршы ке, калыклы кулэзэ уд лэсьты, — вазиськиз А. Соловьёв. — Ватытэк верасько: элькунмес ӝутонэн герӟаськем ужпумъёсын выронъям партийной сюлмаськонъёс палэнэгес кылё. Партилэн Удмурт ёзэзлэн секретарезлэсь полномочиоссэ оскеме потэ Кун Кенешлэн Тӧроезлы Владимир Невоструевлы. Но тодэлэ: партилы юрттыны мон котьку дась.
А. Соловьёвлэн ӵектонэныз люкаськемъёс соглаш кариськизы. В. Невоструев тау кариз но вуоно арын быдэстоно ужпумъёс сярысь ивортӥз. Ар «пӧсь» луоз: сентябре быръёмы Кун Думае но ёрос муниципал кылдытэтъёсы депутатъёсты. «Единая Россилы» эшшо но сэзьгес ужано: та ёзъёсы кандидатъёсты ӵектонъя тулыс ик праймериз радъяно ни. Со сяна, партилэн Удмурт ёзэзлы но пыриськоно Президентлэсь В. Путинлэсь Федерал Собранилы вазиськонзэ быдэсъян уже.