Быдӟым Вормонлы – 70 ар

Удмурт Элькунысь Кун Кенешлэн Тӧроез Владимир Невоструев шаерамы улӥсьёсты Вормон Нуналэн ӟечкылаз.
«9-тӥ май – тупаса улонлэсь дунзэ валась, калыклэсь подвигзэ сюлмазы возись адямиос понна нимысьтыз нунал. Быдӟым войналэн 1 сюрс 418 нуналыз но уез тырмемын вал курадӟонэн но синазькыль каронэн, бадӟым вир кисьтонэн но быдэс странаез куашкатонэн. Но асьме калык ваньзэ чидаз, вормиз. Малы ке шуоно зэмлык вал вордскем музъемзэс утисьёс палан.
Удмуртия трос лэсьтӥз Вормон понна, ож тӥрлык поттыса. Ожлэн нырысетӥ нуналъёсысеныз ик шаерамы обороналы ужаны кутскиз. Советской Союзлэн шундыпуксён палысьтыз тросэз предприятиос татчы ваемын вал. школаосын, кивалтон юртъёсын усьтӥськизы госпитальёс.
Нимысьтыз кылъёс вераме потэ фронтовикъёслы, ож мышкын тыршемъёслы, концлагеръёсын пукемъёслы – ваньмызлы, кин тазалыксэ, егит дырзэ сётӥз Вормон понна. Ваньдылы музъемозь йыбырттӥсько. Сӥзисько тазалык, ваньзэ умойзэ!
Гажано эшъёс! Война ноку медаз вуны. Со сярысь тодэ ваёнъёс мед кылёзы атайлэсь нылпилы!»