Китае ветлэмлы йылпумъянъёс

Элькун Тӧролэн Александр Соловьевлэн кивалтэмез улсын Удмуртиысь делегация вуылӥз Китае. Та кунэ ветлӥз Кун Кенешлэн Тӧроез Владимир Невоструев но.
- Китайысь Хубэй провинцие вуылӥмы. Улӥсез отын 61 миллион пала, нош Ухань шоркаразы — 10 миллион котыр. Араз пукто 10 миллион квадрат метр мында улон юртъёс. Та лыдпус монэ воксё абдратӥз! Янцзы шурзы вамен — со Кам шурмылэсь но, оло, паськытгес — пуктэмын 6 выж, ву ултӥ лэсьтэмын 4 тоннель. Мар шуод: соос сьӧры уйиськыны ум пӧрмытэ. Но малы ужан амалъёсын тодматсконтэм? – журналистъёс азьын йылпумъянъёс лэсьтӥз Удмуртилэн Тӧроез Александр Соловьев.
Хубэй провинциен табере кусып возёмы пӧртэм удысъёсын: мувӧй кыскон вышкаосты лэсьтон, сюрес лэсьтонъя технологиос. Озьы ик огкыл тупатӥмы троллейбусъёсты поттон-басьтон ласянь но.
Таӵе кусыпъёс шаерамы инвестициосты кыскыны юртто. Кылсярысь, ӝоген пыӵаны кутскоз эшшо 6 проект. Кылем арын Удмуртие кыскемын ке вал 80 миллиард пала инвестициос, туэ та лыдпус 10 миллиардлы ятыргес луоз. Со сяна, Удмуртиын азинтӥське машина поттонъя кластерез радъян. Бадӟым уж нуиське экономикая эрико зонаосты усьтонъя. Отчы пыриськись ужбергатӥсьёслы вытъёс ласянь капчиятонъёс чакламын. Вань амалъёсты кутӥськомы экономикаез азинтон понна, — шуиз элькунлэн Тӧроез.