Котырес ӝок сьорын калык кусыпъёс сярысь вераськизы

Элькунамы дауръёсын сюлэсь ятыр пӧртэм калыкъёс эшъяськыса, ог-огзэс валаса, уло. Асьмелэн вань эшъёськон юртмы, ужа Йӧскалык политикая министерство, кылдытэмын 32 калыклэн мерлыко огазеяськонъёссы. Мар лэсьтыны луэ на калыкъёслэсь кусыпъёссэс юнматон понна? Та юанлы валэктон утчазы Кун Кенешысь котырес ӝӧк сьӧрын. Отчы люкаськылӥзы парламентысь депутатъёс, министерствоосысь но ведомствоосысь валтӥсь специалистъёс, мерлыко огазеяськонъёслэн ёзчиоссы. Кенешонэз нуиз кун кенешысь йӧскалык политикая, кышкытлыклэсь утиськонъя, Регламентъя но кун Кенешлэсь ужзэ радъянъя ялан ужась комиссилэн кивалтӥсез Энвиль Касимов.
Вераськон ӟырдыт пӧрмиз. Чузъяськизы кӧня ке пумо докладъёс, котькудаз – малпаськонэ уськытӥсь лыдпусъёс, ужпумъёс. Умой валаськиз: элькунмы Россиысь шыпыт улосъёс пӧлы пыре ке но, шугъяськытӥсез ӧжыт ӧвӧл.
Трос ӵектонъёс чузъяськизы котырес ӝӧк сьӧрын. Соос вылэ пыкиськыса дасямын резолюция. Со келямын луоз министерствоосы но ведомствоосы, иныосысь аскивалтон ёзэсъёсы, калыккуспо огазеяськонъёсы. Соос но, оло, ӵектозы на калыкъёслэсь кусыпъёссэс юнматон амалъёсты. Бӧрысь соос пыртэмын луозы элькунамы экстремизмен нюръяськонъя программае.