Быдӟым ожлы сӥзем вожвылъяськонын вормисьёсты ӟечкылазы

Кун Кенешын ортчиз Егитъёслэн парламентсылэн сессиез. Отын йылпумъянъёс лэсьтэмын шаерамы ортчем «Голоса отваги» вожвылъяськонлы. Со сӥземын вал Быдӟым Вормонлы 70 ар тырмонлы.
Егитъёсты шуныт мылкыдын пумитазы Кун Кенешлэн Тӧроез Владимир Невоструев, солэн нырысетӥ воштӥсез Светлана Кривилева, наукая, дышетонъя, культурая но егитъёсын ужан политикая ялан уажсь комиссилэн кивалтӥсезлэн воштӥсез Ольга Черкасова.
- Вордскем музъемез яратон мылкыд пыӵатон – туала вакытэ туж кулэ уж, - пусйиз Владимир Невоструев. – Угось адӟиськомы: историез асьсэ сямен возьматыны, калыкъёсты ог-огзылы пумит узатыны вырисьёс йыло. Соин ик «Голоса отваги» выллем вожвылъяськонъёслэн пайдазы бадӟым.
Та конкурсэ пыриськизы шаермылэн пӧртэм сэрегъёсысьтыз пиналъёс. Соос видео вылэ гожтӥллям Быдӟым ожысь ветеранэн кенешемзэс, дасяллям улон сюрессы, оже пыриськемзы сярысь рефератъёс. Ваньзэ-ӧвӧлзэ конкурсэ вуиз 20 уж. Но тужгес но устоен лыдъямын 9-эз: соос кутэмын «Мынам Удмуртие» телеканалэн шыкысаз – возьматэмын луозы ожлы сӥзем передачаосаз.
Вормисе потэмъёсты Кун Кенешлэн Тӧроез Владимир Невоструев пусйиз таукаронъёсын но синпель кузьымъёсын.