Владимир Невоструев журналистъёсын пумиськиз

Кун Кенешлэн ӝыны ар ӵоже ужамезлы йылпумъянъёс лэсьтӥз элькун парламентлэн Тӧроез Владимир Невоструев. 25-тӥ инвожое со журналистъёсын пумиськиз.
Ӝыны ар куспын ортчизы дано ужрадъёс – Кун Кенешлы 20 ар тырмиз, Быдӟым Вормонлы – 70. Котрес лыдпусъёсты пусъенэ мыло-кыдо пыриськизы парламентысь депутатъёс. Округъёсысьтызы калыкез соос тодматӥзы Удмуртиысь Кун Кенешлэн кылдэменыз, правоосты но эрикъёсты утён сярысь валэктон уж нуизы. Кун Кенешлэсь котрес лыдпуссэ пусъён улсын ик ортчизы бускель улосъёсысь парламентарийёсын пумиськонъёс, кылсярысь, огкыл юнматэмын Нижний Новгород улосысь кат кылдытъясь ёзэн.
Трос пумиськонъёс ортчытэмын Вормонлы 70 ар тырмонлы сӥзьыса но.
Депутатъёслэн ӝыны ар ӵоже макем пайдаё тыршемзы адӟиськиз юнматэм законъёс вылыны но. Кутэмын шаермылэсь экономиказэ ӝутыны юрттӥсь катъёс: кылсярысь, туэ удыссэс ужбергатӥсьёсты вытъёслэсь мозмытон, элькунамы инвестициосты кыскон сярысь. Со сяна, шаермылы кулэ луись мерлыко объектъёсты пуктыны музъемез басьтыны луоз, конкурс ялытэк, элькунмылэн Тӧроез чакламъя. Вератэк кельтыны уг луы интыосын воштӥськонъёс пумысен но: Кун Кенешысь депутатъёс дурбасьтӥзы элькун Тӧролэн Александр Соловьевлэн ӵектонэзлы – ёросъёсын но каръёсын табере одӥг кивалтӥсь луоз - муниципал кылдытэтлэн йырыз. Сое быръёзы кенешъёсы быръем депутатъёс пӧлысь.
Владимир Невоструев куд-ог мукет катъёсты но пусйиз. Со сяна журналистъёслэн юанъёссылы валэктон сётӥз. Иворъёсты вӧлмытӥсь ёзэсъёсын ужасьёсын пумиськон час пала кыстӥськиз.