Удмуртиысь Кун Кенеш но Москваысь кар Дума ӵош ужан сярысь тупанкыл гожтӥзы
12.11.2015
Удмуртиысь Кун Кенеш но Москва город Думаен кусып возёнъя огкыл кутэмын. Ужкагаз улэ кинюртэмзэс пуктӥзы улос паралментъёслэн кивалтӥсьёссы Владимир Невоструев но Алексей Шапошников.
«Закон кылдытъян ласянь ог-огмылэсь адӟем каромы, пайдаё амалъёсынымы вошъяськомы», - пусйиз Кун Кенешлэн Тӧроез Владимир Невоструев.
«Азьвылэз валче ужан сярысь тупанкылмы 1996-тӥ арын гожтэмын вал. Вуоно аре солы 20 ар тырмоз. Тазьы огкылысь ужаммы умоен берытке Москвалы но, Удмуртилы но», - пусйиз Москва кар Думалэн кивалтӥсез Алексей Шапошников. Солэн верамезъя, выльзэ тупанкылэз гожтон кат кылдытъян уже выль ӧр пыртоз.