Москваын йылпумъяськиз Удмуртилэн арез

12-тӥ шуркынмонэ 2015-тӥ арын Москваын йылпумъяськиз Удмуртилэн арез. Сӥё-дано ужрадэ пыриськизы элькунмылэн Тӧроез Александр Соловьев, Кун Кенешлэн Тӧроез Владимир Невоструев, правительстволэн ёзчиосыз, кунмылэн шоркараз улӥсьёс. Концерт возьматӥзы шаерысьтымы тодмо артистъёс.
Та нуналъёсы ик Удмуртиысь делегация вуылӥз быдӟым конструкторлэн Михаил Калашниковлэн шайвылаз. Ватэмын со Москваысь военно-мемориальной комплексын. Михаил Тимофеевичез буре вайыса, элькунысь вуэмъёс солэсь шайгузэ сяськаосын шобыртӥзы.
Удмуртилэсь арзэ йылпумъян улсын Москвалэн правительствояз ортчизы котырес ӝӧк сьӧрын кенешонъёс. Тужгес но бадӟым саклык висъяськиз инвестициосты кысконлы, тазалыкез утёнлы, туризмез азинтонлы.
Элькунмылэн Тӧроез Александр Соловьёв пумиськылӥз Москвалэн мэреныз Сергей Собянинэн. Та ужрадлы йылпумъянъёс лэсьтыса, Тӧро пусйиз:
— Москвалэн йырыныз кенешимы уно пӧртэм ужпумъёс сярысь. Малы бен асьме гуртоосмылэсь продукцизэс Москваын вузантэм? Гурт предприятиосмылы ватсаса табыш вуысал, нош москваос шумпотысалзы ӟеч сиён-юонмылы. Та кичӧлтонэз пыӵатон бордын ужаськомы ни. Москвалэн Правительствоез кулэ луись документъёс дася ни, нош мыным кылиз на та пумысен Удмуртиысь производительёсын огкылэ вуыны.