Кун Кенешлэн премиез тужгес адӟем карымон студентъёслы сётэмын

24-тӥ шуркынмонэ Кун Кенешлэн кызь одӥгетӥ сессиез усьтӥськиз. Удмуртилэн Тӧроез Александр Соловьев но Кун Кенешлэн Тӧроез Владимир Невоструев элькунысьтымы вузъёсысь 20 тужгес адӟем карымон студентъёслы сётӥзы Кун Кенешлэсь премизэ. Премилэн дуныз – быдэн 11 сюрс 500 манет.
Элькун парламентысь наукая, дышетонъя, культурая но егитъёсын ужан политикая ялан ужась ӧрилэн кивалтӥсез Наталья Сударикова ӟеч дышетскемзы но калыклэн ужъёсаз сэзь пыриськемзы понна егитъёслы тау кылъёссэ вераз. Озьы ик депутат оскиз, азьланяз студентъёс элькунэз но шаерэз юнматозы но утезы шуыса.
Таӵе премиос Кун Кенеш сётъяны кутскиз кылем арысен. Туэ шудоос полы шедизы Удмурт кун университетысь, гурт удысъя академиысь, техникая университетысь, восточно-европейской университетысь, Кама институтысь но Глазов пединститутысь 20 студентъёс. Ваньзы соос – элькун олимпиадаосын, конкурсъёсын вормисе потылэмъёс, исследовательской ужен мыло-кыдо вырисьёс, калык огазеяськонъёсы, волонтер движение мыло-кыдо пыриськисьёс.
Озьы ик тау каронъёс ыстэмын егитъёслэн анай-атайёссылы но.