Кун Кенешысь депутатъёс элькунмылэсь вуоно арлы бюджетсэ дасян бордын тыршо

Кылемаз сессиын элькунмылэн вуоно арлы бюджетэз нырысетӥ лыдӟемен юнматэмын. Коньдэтлэсь инъетсэ депутатъёс октябрь сессиязы эскеризы ни вал. Со бере но со огпол гинэ учкемын ӧвӧл ни Президиумын, ялан ужась комиссиосын, фракциосын. 150 пала дэмланъёс вуэмын на, ваньмыз сямен — соизлы я таизлы удыслы тросгес коньдон висъяны курыса. Ӵектонъёсты депутатъёс лыдэ басьтыны туртто, но соку ик ало: бюджетэз кутон капчиен уг сётӥськы, шыръяно луомы.
Ваньмыз потэ экономикаын секыт югдур кылдэм бордысь. Манет уг юнма, мувӧйлы дунъёс усемын. Соин ик элькунысьтымы Экономикая министерстволэн вуоно арлы прогнозэз уг шумпотты. Сессия дыръя депутатъёсты соин тодматӥз министр Михаил Зайцев:

— Санкциос шӧдӥськизы элькунмылэн экономикаез вылын, — шуиз со. — Уката трос ыштонъёссы луизы вуз карон удыслэн — ог 9 процентлы, лэсьтӥськисьёслэн — ог 14 процентлы. Промышленностьмы, кылем арен ӵошатыса, 98,6 процент вуз поттӥз, гурт удыс — 96,7 процент. Гуртоослы люкетӥз зоро но кезьыт гужем. Чакламъя та лыдпусъёс вуоно арын кӧнялы ке тросгес луыны кулэ. Но со понна трос пӧсяно луоз: палэнысь ваем вузъёс интые асьмелэсь поттыны кутсконо. Туннэ нуналлы импортозамещениея элькунамы 103 проект дасямын ни, но соосты улонэ пыӵатоно на. Бюджет удысын тыршисьёслэн уждунзы ог 7-9 процентлы йылыны быгатоз, но со адямиослэн кисыоссы вылын сокем уз шӧдӥськы — вузъёслы дунъёс но будыны быгатозы.
Экономикая министрлэн вуоно арлы малпанъёсыныз соглаш кариськемзэ вераз Кун Кенешысь Экономикаын политикая, промышленностья но инвестициосъя ялан ужась комиссилэн кивалтӥсез Валерий Бузилов но. Басьяськисьёслэн лыдзы туэ ог 9,5 процентлы кулэсмем ни, вуоно арын югдур воштӥськонлы оскон бадӟым ӧвӧл. Но оскон пыӵатэ, пе, Москва, уката но отын Удмуртилэсь нуналъёссэ ортчытэм бере. Федерация Кенеш Удмуртиез азинтыны юрттон пумысен постановление дасяз ни. Отчы пӧртэм пумо ужпумъёс пыремын, соос пӧлын сюресъёсты выльдон, машина поттонэз юнматон, йӧл кысконэз араз 1 миллион тоннаозь йылэтон, М. Калашниковлы 100 ар тырмонэз пусъён но мукет.
Бюджет нырысетӥ лыдӟемен юнматэмын таӵе лыдпусъёсын: доход люкетэз — 52 миллиард 879 миллион манет, расход люкетэз — 57 миллиард 186 миллион манет, дефицитэз — 4 миллиард 407 миллион манет.
— Бюджет быдэстыны вормымон, туала вакытэз умой-умой валаса, дасямын, — шуиз Кун Кенешысь Бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова. — Дефицит люкетэз — 10 процент, солэсь бадӟымгес карим ке, Россия коммерческой банкъёс азьын тыронъёсмес пытсаны уз юртты ни — та сярысь огкыл гожтэмын элькунмы но Россиысь Коньдон ужпумъёсъя министерство куспын. Но али шуг валаны, бюджетэз кудбыдӟа дефицитэн кутыса умойгес луоз. Саратов улос бюджетсэ дефициттэк кутэ. Пермь улос татчыозь дефициттэк юнматылӥз, но вуоно арлы сое 10 процент карыны медэ.
Сессие пыриськиз Удмуртилэн Тӧроез Александр Соловьёв. Шуиз:
— Бюджетлы проект, эсэпсэ валаса, дасямын. Туж умой: азьло аръёсы сямен ик, нимысьтыз саклык висъяськоз социальной удыслы. Экономикаез юнматонлы ог 10 но ӝыны миллиард манет чакламын. Ватсаса уксё луиз ке, та лыдпусэз эшшо йылэтыны тыршом. Кызьы оскытӥ вал, вунэтэмын уз луэ гуртоос. Кун Кенешлэн но Правительстволэн огазеям Президиумъёсазы огкылэ вуэмын: АПК-лы ватсаса эшшо 120 миллион манет вуоз. Та пӧлысь бадӟым люкетэз кошкоз гуртъёсы фермаос пуктонлы — сотэк араз 1 миллион тонна йӧл уд кыскы.
Александр Соловьёв озьы ик пусйиз: Москваын Удмуртилэн нуналъёсыз бере элькунмылы ватсаса 1,6 миллиард манет сётон сярысь решение кутэмын. Кыӵе удысъёслы со висъяськоз — тодмо луоз ни, бюджетэз кыкетӥ лыдӟемен юнматытозь. Кун Кенешлэн бюджетлы сӥзем 21-тӥ сессиезлэн кыкетӥ люкетэз чакламын 8-тӥ декабрьлы. Нырысетӥ лыдӟемен проект понна куаразэ сётӥз 58 депутат, солы пумит луэмзэ вераз 17-ез.