Владимир Невоструев депутат фракциослэн кивалтӥсьёсынызы пумиськиз

7-тӥ толсуре 2015-тӥ арын Кун Кенешлэн Тӧроез Владимир Невоструев депутат фракциослэн кивалтӥсьёсынызы пумиськиз. Соос эскеризы кызь одигетӥ сессилэн кыкетӥ заседаниезлэсь повесткаысьтыз юанъёсты. Сессия ортчоз ӵукае, 8-тӥ толсуре. Парламентариос 30-лэсь трос ужпумъёсты сэрртозы-пертчозы. Соос пӧлын, Удмурт Элькунлэн 2016-тӥ арлы бюджетэз сярысь законопроект. Отчы 200-лэсь трос ватсанъёс пыртыны дэмламын.
Пумиськонэ пыриськизы «Единая Россия» фракцилэн кивалтӥсез Алексей Прасолов, «КПРФ» фракцилэн - Владимир Чепкасов, «ЛДПР» фракцилэн - Тимур Ягафаров, но «Справедливая Россия» депутат огазеяськонлэн кивалтӥсез Фарид Юнусов. Озьы ик, кенешонэ Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась комиссилэн кивалтӥсез Светлана Кривилёва но Кун Кенешлэн Тӧроезлэн воштӥсез, Кун Кенешлэн бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова пыриськизы.