Владимир Невоструев: Нырысетӥ Май – ужез данъян нунал

Нырысетӥ куарусёнэ Россиын улӥсьёс Тулыслэсь но Ужлэсь нуналзэс пусъё. Кун Кенешлэн Тӧроез Владимир Невоструев Удмуртиысь калыкез праздникен ӟечкылаз:
«Гажано эшъёс!
Нырысетӥ Маез асьмеос котьку но пумитаськомы ӝутскем мылкыдын. Та праздник — тулыслэн сяна, тупаса улонлэн, ужлэн пусэз луэ. Огазея вань калыкез, пыӵатэ ужез гажась, удыссэс сюлмысь азинтӥсь адямиосын данъяськон мылкыд. Кунысьтымы пӧртэм калыкъёс, ог-огзэс гажаса, азьлань улонмес эшшо но умойгес карыны тыршо.
Музъемозь йыбырттӥсько тыршемды понна. Шаермес гинэ ӧвӧл, огъя кунмес ӝутэмды-азинтэмды понна. Азьланяз но тазьы ик лулысь-сюлмысь ужан мылкыдды медаз быры. Тазалык, шудо-буро улон но азинлык тӥледлы!»