Спецоперацие пыриськисьёслэн семьяоссы нылпи сад понна тыриськонъёслэсь момытэмын луоз

Спецоперацие пыриськись военнойёслэн семьяоссылы ватсаса юрттэт сётӥськоз. Та сярысь социальной сетьёс пыр ивортӥз Элькун Тӧро Александр Бречалов. Кун Кенешысь «Единая Россия» фракциысь депутатъёс Тӧролы вазиськизы, ожгарчиослэсь семьяоссэс нылпи сад понна тыриськонъёслэсь мозмытыны курыса. Александр Бречалов та куронлы дурбасьтӥз, ёрос администрациослэн йыръёссылы кулэ луись документъёс дасяны косӥз. Матысь дыре шаерысьтымы детсадъёсын семьяослэсь куриськонъёссэс кутыны кутскозы. «Президент Владимир Путин котькуд улос азе ужпум пуктӥз: спецоперацие пыриськисьёслы котыр ласянь юрттэт сётоно. Боецъёслэн сюлэмзы гань-гань мед луоз: семьяоссы огназы кылемын ӧвӧл, соослы огъя кунмылэсь но, шаермылэсь но пӧртэм пумо юрттэт сётӥське. Котькуд семья борды юнматэмын нимаз адями, со кыл кутэ куронъёссэс кивалтӥсьёс дӥне вуттон но быдэстон понна. Та ласянь юртто «Егит гвардия» огазеяськонысь волонтёръёс, депутатъёс, мыло-кыдоос. Бадӟым уж нуо «Единая Россия» партилэн Удмурт ёзысьтыз нылкышно движенияз но шаерысьтымы Кышномуртъёслэн огазеяськоназ пырисьёс. Тодады вайытон вылысь: военнойёслы пӧртэм юрттэт чакламын. Кылсярысь, соослэсь уг кутӥськы ваньбур понна выт, кредитъёссэс тыронъя каникулъёс сётӥсько, службазэс нуытозязы, судъя приставъёс должникъёслэсь уксёзэс уг талало, озьы ик утисько ужан интыоссы. Семьяоссылы юрттэт сётӥське выплатаослы документъёс люкан, уж инты ӵектон ласянь но уно мукет», - пусйиз Александр Бречалов.