Кун Кенешысь депутатъёс Кузебай Герд вордскем дырысен 125 ар тырмонлы сӥзем ужрадъёсы пыриськизы

Кузебай Герлэн вордӥськем дырысеныз 125 ар тырмонлы сӥзьыса, туннэ Йӧскалык музейын пӧртэм ужрадъёс ортчизы. Ӵукна ик татчы лыктэмъёсты тодматӥзы К. Гердлэн улон сюресэныз. Музейысь ужась Татьяна Швецова вань юанъёслы рос-прос валэктӥз, мадиз.
Нош 11 часын музей вӧзысь К. Гердлэн синпелетэз азьын сӥлы карон ужрад кутскиз. Татчы лыктӥзы «Удмурт Кенеш» огазеяськонлэн активистъёсыз, журналистъёс, УдГУ-ысь студентъёс, К. Герд нимо гимназиысь нылпиос но дышетисьёс но трос мукетъёсыз.
К. Гердэз буре вайыса, вераськизы «Удмурт Кенешлэн» кивалтӥсез, Кун Кенешысь культурая, туризмъя но йӧскалык политика ялан ужась комиссилэн тӧроез Андрей Ураськин, Кун Кенешысь Тӧролэн воштӥсез Татьяна Ишматова, культурая министр Владимир Соловьёв, йӧскалык политикая министр Эдуард Петров, йӧскалык музейлэн директорез Александр Волков.
Синпелет азьын чузъяськизы югдытӥсьлэн кылбуръёсыз. Пыд азяз валиськизы сяськаос.
Ужрад азьланьтӥськиз Йӧскалык музейын. Татын калык тодматскиз Кузебай Гердлэн тусыныз поттэм конвертэн. Татын ик почта марка вылэ Гердлэн тусыныз нимысьтыз штемпелез пуктон сӥё-дано ужрад ортчиз.
Музейын озьы ик Гердлэсь кылбуръёссэ лыдӟизы К. Герд гимназиысь нылпиос, удмурт университетысь студентъёс.
Люкаськемъёс "Мон удмурт. Мон - туж шудо" адӟытонэн тодматскыны быгатӥзы на.