Удмуртиын ортчиз чуваш театрлэн нуналыз

Россиысь калыкъёслэсь лулчеберетсэс, узырлыксэс утён ар улсын Удмуртие вуиз Чувашиысь Константин Ивановлэсь нимзэ нуллӥсь академ кун театр. Чебоксарыысь артистъёс кыкетӥ толсуре нырысьсэ Удмурт сцена вылын шудӥзы. Чувашиысь театр возьматиз «Ялта» («Гуртын») крезьгуро драмаез.
Чуваш элькунысь артистъёсын пумиськиз Удмуртиысь Кун Кенешысь лулчеберетъя, туризмъя но йӧскалык политикая ялан ужась комиссилэн тӧроез Андрей Ураськин. Чувашиысь кун театрлэн кивалтӥсеныз Юрий Владимировен, Удмурт Элькунысь йӧскалык театрлэн валтӥсь режиссёреныз Алексей Ложкинэн но Удмуртиысь чуваш йӧскалык огазеяськонлэн кивалтӥсеныз Ольга Абужаевен ӵош со журналистъёсын пумиськонэ пыриськиз.