Вормон нуналэ оже но уже пыриськемъёсты данъян Монумент доры сяська понӥзы

Туннэ, 9-тӥ куартолэзе, Ижкарысь Вормон скверын Ялан ӝуась тыл доры сяська понон сиё-дано ужрад ортчиз. Ужрадэ пыриськизы Элькунлэн Тӧроез Александр Бречалов, Кун Кенешлэн Тӧроез Владимир Невоструев, сенаторъёс но Росси Кун Думаысь, Удмуртилэн Кун Кенешысьтыз, Ижевск Кар Думаысь депутатъёс, Элькун Кивалтэтлэн ёзчиосыз, ужась коллективъёслэн, егитъёслэн парламентсылэн, мерлыко огазеяськонъёслэн но движениослэн ёзчиоссы, Кун Кенешлэн Аппаратаз ужасьёс, кадетъёс, шоркарын улӥсьёс но лыктэм куноос.
Быдӟым Атыкай ожын быремъёсты чус улон минутэн буре вайизы.
«Туннэ Россиын улӥсь вань калык пусъе Вормон нуналэз. Адӟиськом, макем трос адями Ялан ӝуась тыл доры сяськаен лыктэ. Со – асьсэлэсь улонзэс асьмелэн но нылпиосмылэн туннэ нуналзы понна сётэм ожгарчиослы тау карон. Та нуналэ мон котьку ветлӥсько атаелэн шайгу вылаз. Со 1942-тӥ арысен Вормон нуналозь ожмаськиз, трос пол сӧсырмылӥз, война бере вордӥськем гуртсэ ӝутон борды тыршиз. Ветлӥсько анаелэн шайгу вылаз. Со Ижевск-Балезино чугун сюресэз лэсьтонын ужаз. Та нунал мынам семьяе понна туж дуно но дано», - шуиз Владимир Невоструев.
Туннэ ик парламентарийёс Быдӟым атыкай оже пыриськем депутатъёслы сӥзем синпелет доры сяська понӥзы.