Ижкарын Кузебай Герд вордӥськем дырысен 123 ар тырмонэз пусйизы

Туннэ, 14 толшоре, 123 ар тырмиз удмурт гожъясь, литератураез эскерись, кылысь кылэ берыктӥсь, критик, фольклорист, этнограф, дышетӥсь, крезьгурез эскерись, мерлыко ужась Кузебай Герд (Кузьма Павлович Чайников) вордӥськем дырысен. Ижкарын, Кузебай Гердлэн синпелетэз дорын, удмурт калыклэсь дано пизэ буре ваён ужрад ортчиз. Отчы пыриськизы Кун Думаысь депутат Алексей Загребин, Кун Кенешысь наукая, культурая, туризмъя но йӧскалык политикая ялан ужась ӧрилэн кивалтӥсез Татьяна Ишматова, быдэсъясь тӧрлык ёзъёсын, дышетон но культура ужъюртъёсын ужасьёс, мерлыко огазеяськонъёслэн ёзчиоссы.
Татьяна Ишматова пусйиз, Кузебай Гердлэн лэсьтэм ужъёсыз удмурт калыклэсь культуразэ, кунлыксэ юнматонын туж бадӟым инты басьто. Солэн вордӥськем нуналыз Удмурт Элькунлэн дано нуналэз луэ. Со юнматэмын 2020 арын 24 коньывуонэ кутэм катэн.
Люкаськемъёс Кузебай Гердлэсь кылбуръёссэ лыдӟизы, синпелетэз доры сяська керттэтъёс понӥзы.