Кун Кенешлэн Президиумезлэн ёзчиосыз Удмуртилэн Росси Кун Думаысь депутатъёсыныз пумиськылӥзы

Туннэ, 13 толшоре, Удмуртиысь Кун Кенешлэн Президиумезлэн ёзчиосыз Элькунлэн Росси Кун Думаысь депутатъёсыныз кенешон ортчытӥзы. Вераськонэз видеонференция амалэн нуиз элькун парламентлэн спикерез Владимир Невоструев. Вераськонэ пыриськизы Кун Думаысь «Единая Россия» фракцилэн кивалтӥсезлэн Нырысетӥ воштӥсез Андрей Исаев, депутатъёс Валерий Бузилов, Александр Василенко но Алексей Загребин, Удмуртилэн Кун Кенешысьтыз ялан ужась комиссиослэн но фракциослэн кивалтӥсьёссы, депутатъёс.
Кун Думаысь депутатъёс 2020 арын кутэм валтӥсь катъёс но туэлы чаклам ужпумъёс сярысь ивортӥзы.
Андрей Исаев тодэ вайытӥз, кылем арын мерлыко пособиосты но тыронъёсты басьтонэз капчиятонъя кӧня ке катъёс ужаны кутскизы шуыса. Росси Азьмуртлэн кичӧлтэмезъя, кутэмын больничной листъёс понна коньдон тыронъя радлык. Табере со тужгес пичи уждунлэсь ӧжытгес луыны уг яра. Озьы ик юнматэмын эмчиослы но дышетӥсьёслы юрттэт сётонъя законъёс, кылсярысь, классэн кивалтэм понна ватсэт тырон.
2021 арлы бюджетысь куиньмос люкетэзлэсь ятыр уксё кутӥськоз мерлыко ужпумъёсты быдэсъяны, пусйиз Андрей Исаев. Пособиослы индексация ортчытӥськоз. Выль сямен лыдъяськыны кутскоз улыны-вылыны кулэ луись минимумлэн но тужгес пичи уждунлэн быдӟалазы. Солы луыса, матысь вить ар ӵоже соос инфляцилэсь ӝоггес будозы, вераз Кун Думаысь «Единая Россия» фракцилэн кивалтӥсезлэн Нырысетӥ воштӥсез.
Кылем арын сэрттэм-пертчем ужпумъёс пӧлын озьы ик – палэнысен ужанэз катэн юнматон. Андрей Исаевлэн верамезъя, пандемия кутскыку, ужзэ палэнысен 60 сюрс адями нуэ ке вал, али сыӵеос 6 миллион пала ини. Соослэсь ужзэс радъян понна ужъя катрадлыке воштонъёс пыртоно луиз. Туэ со воштонъёс кужымазы пыризы.
Депутатъёс Валерий Бузилов, Александр Василенко но Алексей Загребин веразы Кун Думаысь комитетъёсын ужамзы, асьсэ ӧръёссыя дасяськись катӵектосъёс сярысь.
Кун Кенешысь депутатъёс асьсэлэсь ӵектонъёссэс но дэмланъёссэс шараязы.