Ижкарын Вань удмуртъёслэн XIV ӧтчамзы мынэ

Туннэ Ижкарын Вань удмуртъёслэн «Удмурт кенеш» улосвылкуспо ассоциацизылэн XIV ӧтчамез ужаны кутскиз. Сое огазеяськонлэн Тӧроез Татьяна Ишматова усьтӥз. Ӧтчамлэн ужаз Удмуртиысь но Россилэн кӧня ке улосвылъёсысьтыз делегациос пырисько. Делегатъёс азьын вераськизы Удмуртилэн Тӧроез Александр Бречалов но Кун Кенешлэн Тӧроез Владимир Невоструев. Александр Бречалов пусйиз, «Удмурт кенеш» огазеяськон пӧртэм йӧскалык огазеяськонъёс пӧлын грантъёсты кысконъя азьмынӥсь луэ. «Йӧскалык политикая министерстволы егитъёслэсь удмурт лулчеберетэз но кылэз азинтонъя ӵектосъёссэс быдэсъянлы Элькун Тӧролэсь грантъёссэ кылдытонъя дэмланъёссэ дасяны кури», - ивортӥз Элькун Тӧро. Александр Бречалов тодмо тодосчилы Кузьма Куликовлы «Удмурт Элькунлэн Дано кунмуртэз» дано нимез сётӥз. Ог куамын ар ӵоже со Россиысь наукаосъя академилэн историяя, кылъя но литературая Удмурт институтэныз кивалтӥз, удмурт калыклэсь историзэ эскеронъя трос уж лэсьтӥз. Кун Кенешлэн Тӧроез Владимир Невоструев пусйиз, вань удмуртъёслэн ӧтчамъёсазы калык понна тужгес лэчыт луись ужпумъёс ӝутӥсько, соосты сэрттыны-пертчыны амалъёс шараясько шуыса. «Удмурт кенеш» туннэ – Удмуртиысь одӥгез бадӟымез но йӧноез мерлыко йӧскалык огазеяськон. Со шӧдскымон инты басьтэ быдэс финн-угор дуннеын. Татьяна Витальевна (Ишматова) Кун Кенешен валче ужа. Ми азьланяз но солы юрттыны тыршом» - шуиз Владимир Невоструев. Удмурт культураез но кылэз азинтонын бадӟым уж лэсьтэ «Удмуртия» элькун телерадиокомпания, - пусйиз элькун парламентлэн спикерез. «Мон котьку шумпотыса удмурт кылын радиоверанъёсты кылзӥсько, удмурт телеадӟытонъёсты учкисько, меӵак эфирын мынӥсь вераськонъёсы пыриськисько. Радиоэфир дыръя кылзӥсьёслэсь трос юанъёс-вазиськонъёс вуо, котькудӥзъя соосъя уж мынэ эфир ортчем бере но», - вераз Владимир Невоструев. Со удмурт кылын мынӥсь передачаослэсь лыдзэс йылэтыны ӵектӥз. Кылсярысь, телеканалын нуналлы быдэ мынӥсь «Бур ӵукнаен!» телеадӟытон усьтыны. Владимир Невоструев озьы ик Удмуртиысь кун кылъёс но шаерамы улӥсь мукет калыкъёслэн кылъёссы сярысь катэз быдэсъянъя выль программа дасяны ӵектӥз.