«Удмурт Элькунлэн 2021 но вуоно 2022 но 2023 аръёслы бюджетэз сярысь» кат быдэсак кутэмын

15.12.2020 Туннэ Кун Кенешлэн кызь укмысэтӥ сессияз депутатъёс «Удмурт Элькунлэн 2021 но вуоно 2022 но 2023 аръёслы бюджетэз сярысь» катэз быдэсак юнматӥзы.
Кызьы вераз бюджетъя, вытъёсъя но коньдон ужпумъёсъя ялан ужась ӧрилэн кивалтӥсез Юрий Тюрин, кыкетӥ лыдӟонлы катӵектосэ 549 тупатон вуиз. Озьы вуоно арлы коньдэтлэсь табыш люкетсэ 10 млрд 563,9 млн манетлы йылэтыны ӵектӥзы. 10 млрд 12 млн манетэз со – федерал юрттэт. Уже кутон люкет 10 млрд 771,2 млн манетлы будэтэмын. 207,3 млн манетлы бадӟымгес луиз бюджетлэн дефицитэз. Кыкетӥ лыдӟонлы 3 млрд манетлэсь трослы будӥз дышетон удыслы висъяно коньдон. Со пӧлысь 1,5 млрд манетэз мыноз дышетскисьёсты сюдонлы.
Тазалыкез утён удыслы 1,8 млрд манет ватсамын. 1 млрд манетлэсь ятыр уксё кошкоз нырысь-валысь эмъюрттэт сётон удысэз кужмоятонлы.
Мерлыко юрттэт сётон ужрадъёслы 2,9 млрд манет йылэтэмын. Со пӧлысь 2,1 млрд манетэз – 3-сен 7 аресозь нылпиослы толэзьлы быдэ тыронъёслы.
Ватсамын экономика удыслы но юрттэтлэн быдӟалаез.
Тупатонъёсты лыдэ басьтыса, 2021 арлы бюджетлэн табыш люкетэзлэн быдӟалаез 76 млрд 499,1 млн манет луиз, уже кутон люкетэз - 76 млрд 730 млн манет, дефицит - 230,9 млн манет.
Юрий Тюрин пусйиз, бюджетысь коньдонлэн бадӟым люкетэз азьвыл сямен ик мерлыко ужрадъёслы кутӥськоз. Коньдэтэз быдэсъяку, солэсь табыш люкетсэ будэтон ужпум валтӥсь луыса кылёз.