Удмуртиысь Егитъёслэн парламентсылэсь выль ӧтчамзэ кылдытон уж кутскемын

Туннэ Кун Кенешлэн Тӧроез Владимир Невоструев Егитъёслэн Кун Кенеш бордын ужась парламентсылэсь витетӥ ӧтчамзэ кылдытонъя комитетлэсь кенешонзэ ортчытӥз. Выль ӧтчамез туэ тулыс бичаны кулэ вал ини, но пандемиен сэрен та ужез сизьыллы кельтыны кенешемын вал.
Положения, Егитъёслэн парламентазы 18-сен 35 аресозь адямиос пыриськыны быгато. 30-эз ёзчиос конкурс амалэн бырйисько. Соос комиссилы асьсэлэсь чектосъёссэс возьматыны кулэ. Эшшо 30 адямиез ысто на ёросъёсысь но каръёсысь Егитъёслэн парламентъёссы – котькуд муниципал огазеяськонысь быдэн одӥг мурт.
Туэ парламентэ кандидатъёслы азьвыл аръёсы сямен дурбасьтӥсьёслэсь кинюртэмъёссэс люкано уз луы. Но конкурсэ выль ужъёс пыртэмын. Соос пӧлын – Росси Федерацилэсь но Удмурт Элькунлэсь Конституциоссэс тодэмез эскеронъя тест. Со сяна, оргкомитетлэн ёзчиосыз кандидатъёслы сётоно юанъёс пӧлы Удмуртилэн кунлыкезлы 100 но Быдӟым Атыкай ожын Вормонлэн 75 ар тырмонзылы сӥзем юанъёсты пыртыны ӵектӥзы.
Ялэмын конкурслэн нырысетӥ люкетэз – 17 гудырикошконэ вожвылъяськонэ пыриськыны куриськонъёсты но конкурс ужъёсты кутон кутскиз. Со 20 куарусёнозь кыстӥськоз. Вормисьёс шараяськозы конкурс ужъёсты комиссия азьын утем бере.
Конкурс комиссиен кивалтоз Кун Кенешлэн Тӧроезлэн Нырысетӥ воштӥсез, тазалыкез утёнъя, демографи но семья политикая ялан ужась комиссилэн кивалтӥсез Надежда Михайлова.
«Асьмеос егит парламентарийёслэсь зол командазэс кылдытыны кулэ. Конкурс отчы тужгес быгатӥсь, валась, ужаны мылкыд карись, вордскем шаерзылы пайда вайыны тыршись адямиосты бырйыны мед юрттоз», - сӥзёнъёссэ вераз Кун Кенешлэн Тӧроез Владимир Невоструев.
Егитъёслэн парламентсылэсь витетӥ ӧтчамзэ кылдытонъя пыр-поч ивортонэз шедьтыны луоз татысь: http://udmgossovet.ru/interaction/youth/news/28213/