Удмурт Элькунлэн 2019 арлы бюджетэзлэн быдэстӥськемез сярысь катӵектосъя калык кылзонъёс ортчозы 10 инвожое

Туннэ Кун Кенешлэн Президиумез Элькунлэн 2019 арлы бюджетэзлэн быдэстӥськемез сярысь катӵектосъя кылзонъёсты ортчытон нуналэз юнматӥз.
Кылзонъёс очной но заочной амалэн радъяськозы. Заочной люкетсы 3 инвожое кутскоз но 7 инвожоозь кыстӥськоз. Со дыр ӵоже шаерын улӥсьёс Кун Кенеше бюджетэз быдэстэмъя асьсэлэсь ӵектонъёссэс но дэмланъёссэс лэзьыны быгатозы. Соосты электрон яке кагаз гожтэтъёсын ыстыны луоз.
Кылзонъёслэн очной люкетсы Кун Кенешлэн юртаз 2020 арын 10 инвожое 10.00 часын ортчоз. Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Юрий Тюрин тодэ вайытӥз, эпидемиологи югдурез лыдэ басьтыса, очной люкетэ трос калык ӧтемын уз луы шуыса. Отчы пыриськозы Элькун Тӧро яке солэн ыстэм муртэз, Кун Кенешысь депутатъёс, Кивалтэтлэн ёзчиосыз, Эскеронъя Кун комитетлэн ёзчиосыз, Кун Кенешлэн Аппаратысьтыз ужасьёс.
Кун Кенешлэн сайтаз кылзонъёслэн онлайн трансляцизы мыноз. Сайтэ ик интыямын луозы кылзонъёслы материалъёс.
Кылзонъёслэн очной люкетсы ортчем бере куинь нунал ӵоже (13 инвожоозь) вань мылкыд карисьёс Кун Кенеше ӵектонъёссэс но дэмланъёссэс лэзьыны быгатозы.