Шоркар выльдӥське
21.07.2016
Кун Кенешлэн Тӧроез Владимир Невоструев Ижысь Берш урамысь 29 номеро выль юртын корка пырон ужрадэ пыриськиз. Озьы ик, отчы вуылӥзы элькунмылэн Тӧроез Александр Соловьев, Иж городлэн йырыз Юрий Тюрин но мукет кивалтӥсьёс.
Выль юртын асьсэлы сэрег шедьтӥзы 202 семьяос. Соос пӧлысь «Егитъёслы квартира» программая улон инты басьтыны быгатӥз 21 семья.
— Та программа шаерамы ужаны кутскиз 2015-тӥ арын, — вераз Александр Соловьев. — Егитъёслы со кельшиз. Квартиралы черодэ султӥз 2 сюрс 200 семья. Пӧлысьтызы 624-ез нырысь взнослы субсидия басьтыны быгатӥз ини. Туэ та программалы чакламын 130 миллион манет висъяны. 100 миллионэз кутӥськиз ини.
Тӧро пусйиз: программалэн пайдаез бадӟым — егитъёслы но юрттэ, лэсьтӥськон удысэз но ӝутэ. Туннэ огкыл гожтэмын лэсьтӥськонэн вырись 13 огазеяськонъёсын. Соос азьланяз 30 пала корка пуктыны кулэ. Огазеяськонъёс оскымонэсь. 29 номеро юртэз «Аспэк» ӝыны арлы вазьгес ӝутыны пӧрмытӥз.
«Восток» микрорайонын азьланяз ӝутӥськозы нылпи сад, школа, спортъя площадка. Туннэ отысь азбарын покчиослы шудон сэрег вань ини. Ӵыж-выль коркаосты, нылпиосын пачылмем урамъёсты адӟыса, Юрий Тюрин мылкыдзэ вератэк ӧз чида: тӥни кыӵе луыны кулэ туала шоркармылэн тусыз!
Азбарын покчиослы шудон инты вань ини.
Нялтас вераса, шаерамы туэ ӝыны ар ӵоже, кылем арын таӵе вакытэн ӵошатыса, 19,6 процентлы тросгес квартира лэсьтэмын.