Удмуртиын ожын бырем милиционер-фронтовикъёслы синпелет усьтӥзы

Юкаменск ёрос полицилэн юрт азяз милиционер-фронтовикъёслы сӥзем синпелет усьтӥськиз. Ужрадэ пыриськиз Кун Кенешлэн Тӧроез Владимир Невоструев. «Та синпелет возьматэ гажанэз ваньзылы, кин шаерлэсь чалмыт улонзэ утьыны султӥз, кин Бадӟым Атыкай ожын ожмаськиз», - шуиз Элькун парламентлэн кивалтӥсез. Со пусйиз, Юкаменск ёросысь оже кошкизы ньыль сюрслэсь трос адямиос, куинь сюрслэсь тросэз доразы ӧз вуэ. Соос пӧлын сизьым милиционеръёс, кудъёссылэсь нимъёссэс синпелетэ вунэтонтэм каризы. Арасланов Латыф Ахметшин, Балтачев Хафиз Латыфович, Булдаков Аркадий Михайлович, Бурков Михаил Николаевич, Веретенников Евлампий Ильич, Мышкин Александр Андреевич, Тимофеев Данил Кириллович соослэн нимъёссы.
Ужрадын тау карон кылъёссэ Владимир Невоструев вераз Виктор Васильевич Пономарёвлы, Кунпуш ужъёсъя министерстволэн ветеранэзлы. Солэн малпамезъя та синпелет пуктэмын.