Республикамы юрттоз гуртын йӧл поттон удысын тыршись ужбергатӥсьёслы

Кун Кенешлэн кивалтӥсез Владимир Невоструев Удмуртилэн Тӧроеныз Александр Соловьёвен ӵош Грак ёросысь Вынлуд гуртысь крестьян возёсэ вуылӥзы. Отын соос гурт предприятилэн кивалтӥсеныз Павел Усольцевен вераськизы.
Возёс кык ар пала гинэ ужа на. Со дыр ӵоже Вынлудын аналтэм музъемъёсты кизизы, кӧня ке скал гидъёс пуктӥзы.
«Милям 50 адями ужа. Шоро-куспо уждун — 15–20 сюрс манет. Али уллёын 600 йырлэсь трос пудо, со пӧлысь 200 палаез — кысконо скалъёс», — вераз Усольцев.
Гид пуктон, пудо но выль техника басьтон понна егит ужбергатӥсь кӧня ке дасо миллион манет быдтӥз. Отысь бадӟым люкетэз — кредитъёс. Александр Соловьёв оскытӥз, предприятилы чаклам субсидиос — 10 миллион манет, та нуналъёсы вуозы. Федерал программая элькун 190 миллион манет басьтоз, сое гурт возёсъёс куспын люкозы.
«Мар лэсьтэ татын Павел Усольцев, монэ паймытӥз. Со уг кышка кредитъёс басьтыны, солэн сэзь луэмез, гуртын улыны но гуртоослы юрттыны мылкыдэныз солэн ваньмыз пӧрмоз. Ми но солы юрттомы», - вераз Александр Соловьёв.
Грак ёросысь фермерлэн чакланъёсаз — кунян гид ӝутонэз йылпумъян, кунянъёсты сюдон тӥрлык басьтон но ю-тысь куасьтон пуктон