«За любовь и верность» медаль басьтӥзы Ижкарысь 35 кузпалъёс

Семьялэн, яратонлэн но осконлыклэн нуналаз, 8-тӥ пӧсьтолэзе, Ижкарысь 35 кузпалъёс «За любовь и верность» медаль басьтӥзы. Ужрад ортчиз семьялы дурбасьтӥсьёслы - дун чылкыт Пётрлы но Феврониялы сӥзем синпелет дорын.
Та мерлыко данъетэн пусъё трос аръёс ӵошен улэм, нылпиоссэс учкымон будэтэм кузпалъёсты. Медаль бырттӥзы Пётр но Валентина Ёлкинъёс но.
«Ми кузпалэным 45 ар ӵош улӥськом ини. Одӥг гуртын будӥмы, одӥг школаын дышетскимы. Нырысетӥ классын дышетскыкум ик яратӥ ни. Мон малпамея, дунне вылэ вордӥськыны — со шудбур ни. Озьы ик тон шедьтӥд ке яратоно адямидэ, яратоно уждэ но дорад луизы ке анай-атаед…», — вераз Удмуртиысь калык суредась но Россиысь дано суредась Пётр Ёлкин.
Кузпалыз Валентина Ёлкина вань улонзэ нылпиосын ужаз, со Удмуртиысь дано эмчи.
«Та данъетэз басьтон витьымтэ шорысь луиз. Трос умой семьяос вань ук. Милемыз бырйизы шуыса туж шумпотэмын», — мылкыдзэ усьтӥз кышномурт.
Семьяосты ӟечкылаз Удмуртиысь Кун Кенешлэн тӧроез Владимир Невоструев.
«Котькуд адямилэн улоназ валтӥсь инты басьтэ семья. Отын со визьнодан, улонэ путёвка басьтэ. Шумпотыны, но данъяськыны кулэ, асьмелэн сыче умой, но адӟем карымон семьяос вань шуыса. Семьяослэн огкылысь но шудбуро улонзы понна Кун Кенеш но, Удмуртилэн тӧроез но, «Единая Россия» партия, но трос уж лэсьто. Соин валче элькунамы семьяослэн лыдзы будэ. Ми но зэмос семьяосты висъяны тыршиськом. «Материнская слава» но «Родительская слава» данъетъёс кылдытэмын. Россиысь азьмуртлэн косэмезъя, анай капиталэз 2018-тӥ арозь сётъялозы. Азьпалан но семьяосты юнматон понна ваньзэ лэсьтомы», — вераз со.
Озьы ик ӟечкылан кылъёсын вазиськиз Удмуртиысь кивалтэтлэн тӧроезлэн воштӥсез Сергей Фефилов. Солэн верамезъя, «семья — кунлэн валтӥсь люкетэз». Со кужмо луиз ке, кун но кужмо луоз.
«Со огшоры гинэ ӧвӧл. Семья кылдытыны малпась котькуд адями аслаз кузпалэз, нылпиосыз азьын кылкутыны кулэ», — пусйиз со.
Россиын праздникез пусйыны кутскизы 2008-тӥ арын. Солэн данлыкез арысь аре будэ. 2012-тӥ арын Ижкарысь Свято-Михайловской собор вӧзын дун чылкыт Пётрлы но Феврониялы синпелет пуктӥзы. Табере семьяен герӟаськем тужгес пусйымон ужрадъёс ӵапак отын ортчытъясько.
Ижкарысь адӟем карымон кузпалъёсты семьялэн, яратонлэн но осконлыклэн нуналэныз озьы ик ӟечлыказы чебер эктонъёсын но кырӟанъёсын.