Удмуртиын сӧсыръёслэн киноысь крезьгуръёслы но кырӟанъёслы сӥзем улосвылкуспо фестивальзы ортчиз

5-тӥ пӧсьтолэзе Удмуртиысь кун мунё театрын сӧсыръёслэн «Музыка, песни российского кино» фестивальзы ортчиз. Отчы пыриськизы Удмуртиысь, Татарстанысь, Пермь шаерысь но Киров улосвылысь калыклы мерлыко юрттэт сётонъя ужъюртъёсысь 22 коллективъёс но тазалыкез юнматонъя «Лесная сказка» лагерьысь пиналъёс. Фестивалез усьтӥз Удмуртиысь кырӟанъя но эктонъя «Италмас» ансамбль. Со быдэстӥз «Самовардэ пукты али, ой, уроме» кырӟанэз. Собере ужрадэ пыриськисьёслы вазиськизы Удмуртилэн Кун Кенешысьтыз мерлыко политикая ялан ужась ӧрилэн кивалтӥсез Ольга Казанцева, элькун кивалтэтлэн тӧроезлэн воштӥсез Сергей Фефилов, лулчеберетъя но туризмъя министр Владимир Соловьёв, мерлык, демографи но семья политикая министрлэсь ужзэ огдырлы быдэсъясь министр Елена Саламатова.
«Нырысетӥез фестиваль ортчиз Воткаын. Соиз ужрад Пётр Чайковскийлэн юбилеезлы сӥземын вал. Отчы пыриськизы Удмуртиысь мерлыко юрттэт сётонъя ужъюртъёсысь кырӟаны но эктыны яратӥсьёс. Нош таиз фестиваль мукет улосвылъёсысь но лыктэм куноосты пумита», — веразы фестивалез радъясьёс.
Таиз ужрад Россиысь кинолэн арезлы сӥземын. Чакланъёсъя, та фестиваль ляб тазалыко но сӧсыр луэм адямиос пӧлын кино удысэн тунсыкъяськонэз будэтыны юрттоз. Со понна ик сцена вылын пӧртэм фильмъёсысь кырӟанъёсты быдэстӥзы, эктӥзы, пичиесь постановкаос возьматӥзы. Тросэз ужъёс «Иван Васильевич меняет профессию», «Любовь и голуби» но Быдӟым Атыкай ожлы сӥзем кинофильмъёсъя пуктэмын вал.
Фестивалез йылпумъяса, вань коллективъёслы дипломъёс но дуно кузьымъёс сётӥзы.