Владимир Невоструев: Удмуртилы коньдонэн ватсаса юрттэт сётон сярысь катӵектосэз Кун Дума эскероз

Троссэ вытъёссэс федерал коньдэтэ келясь улосвылъёслы ватсаса юрттэт сётон сярысь катӵектосэз Россиысь Кун Думаын эскеро. Журналистъёслы со сярысь ивортӥз элькунысь Кун Кенешлэн тӧроез Владимир Невоструев.
«Ми улосвылъёслы юрттонъя катӵектосэн потӥмы вал. Соос пӧлы пыре Удмуртия но. Улосвылын бичам 34 процентэз вытъёс элькун коньдэтэ кылё, Россилэн бюджетаз 66 процентэз кошке. Али ужкагазэз Кун Думаын эскеро. Милям чакламмыя, со фонд луыны кулэ», — ивортӥз элькун парламентлэн тӧроез.
Владимир Невоструевлэн верамезъя, Федераци Кенеш но солэн тӧроез Валентина Матвиенко элькунлы дурбасьто, ужпумез нимысьтыз чакласа возё.
Кун Кенешлэн тӧроез озьы ик пусйиз, кыӵе быдӟалаез луоз фондлэн но кӧня юрттэт басьтоз Удмуртия, али тодмо ӧвӧл на.
«Фонд таяз арын кылдытэмын луоз ни, оло, отысь ми мар ке но басьтомы ни», — вераз Владимир Невоструев.
Тодэ вайытом, Россиын вань улосвылъёс, кудъёсыз 50 процентлэсь унозэ бичам вытъёссэс федерал коньдэтэ сёто. Ӵапак соослы юрттонэн герӟаськемын Удмуртиысь парламентлэн кичӧлтонэз. Элькунысь Кун Кенешлэн катӵектосэзъя, Россиын нимысьтыз фонд кылдытэмын луыны кулэ, отысь сыӵе улосвылъёслы юрттэт висъяськоз.