Буре ваён но кайгырон нуналэ Ижкарын Ялан ӝуась тыл доры сяськаос понӥзы

22-тӥ инвожое 4 часын ӵукна Быдӟым Атыкай ожын быремъёсты буре вайыны Ижкарысь Ялан ӝуась тыл дорын пӧртэм адямиос пумиськизы — интыосын ожъёсы пыриськем ветеранъёс, казакъёс, байкеръёс но егитъёс. Митинге вуиылӥзы Удмуртилэн тӧроез Александр Соловьёв, Кун Кенешлэн тӧроез Владимир Невоструев но мерлыко огазеяськонъёслэн кивалтӥсьёссы.
«Туннэ вазь ӵукна асьмеос нош ик 75 арлы берлань выжиськомы. 1941-тӥ арын 22-тӥ инвожо тазьы ик чус кутскиз. Со нунал асьме историмез «ож дорозь» но «ож бере» вакытъёслы люкиз. Та Ялан ӝуась тыл — вормон понна тыршем улосчиосмес сӥлы карон. Нош туннэ Смоленск улосвылын асьме улосчиосмылы — Удмуртиын кылдытэм 357-тӥ стрелковой дивизиын ожмаськемъёслы сӥзем эшшо одӥг синпелет усьтозы. Поисковикъёс али но отын ожгарчиослэсь лысьӧмъёссэс шедьтыло на. Асьме делегация со обелиск улэ удмурт музъем вылысь нуэм сюез поноз», — вазиськиз элькунлэн тӧроез ужрадэ люкаськемъёслы.
Кун Кенешлэн тӧроез Владимир Невоструев кунмес, эрико уолнмес утьыса ожын быръемъёсты котьку данъяны мед быгатомы шуыса пусйиз. «Секыт аръёсы Совето Союзысь вань калыкъёс огазе кариськыса фашизмез вормизы. Сое ноку но вунэтыны уг яра», - шуиз со.
Собере ваньмыз Ялан ӝуась тыл доры сяськаос понӥзы.
Тодэ вайытом, Буре ваён но кайгырон нунал Россиын пусйиське 1996-тӥ арысен. 22-тӥ инвожое фашистъёслэн войскооссы СССР-лэн интывылаз пыризы. Та нуналэ быдэс Россиын ваньмыз куншетъёс лэзисько, нош лулчеберетъя ужъюртъёслы, телеканалъёслы но радиостанциослы шулдыръяськон ужрадъёс но передачаос лэзёнлэсь возиськыны ӵектэмын.