2 миллиард 800 миллион манетлы будэтӥзы Удмуртилэн 2016-тӥ арлы коньдэтэзлэсь расход люкетсэ

21-тӥ инвожое Удмуртиысь Кун Кенешысь депутатъёс элькунлэн 2016-тӥ арлы коньдэтаз воштонъёс пыртон сярысь кивалтэтлэн катӵектосэзлы дурбасьтӥзы. Расход люкетсэ 2 миллиард 817 миллион манетлы быдэтӥзы, табыш люкетсэ — 2 миллиард 450 миллион манетлы, тырмисьтэм люкетэз 4 миллиард 300 миллион манетозь вуиз.
Табыш люкетэз тырмытон валтӥсь ӧръёс — Росси коньдэтысь берыктонтэм вылысь уксё (1 миллиард 967 миллион манет тыр). 115 миллион 100 сюрс манетлы будэтэмын вытъёс но мукет тыронъёс чотын табышъёс, 110 миллион 100 сюрс манетлы — дунын юрттӥськетлэсь табышъёс, 14 миллион 300 сюрс манетлы — активъёсты вузамлэсь табышъёс.
Расходъёс трослы будӥзы сюрес возёс чотын — Удмуртиысь транспортъя но сюрес возёсъя министерстволы ассигнованиос 1 миллиард 240 миллион манетлы будэтэмын. Школаос пуктыны шуыса, 431 миллион 800 сюрс манет висъялозы элькунысь лэсьтӥськонъя, архитектурая но улон инты политикая министерстволы.
Озьы ик ватсаса коньдон висъялозы Удмуртиысь дыкужымъя, жилищно-коммунальной возёсъя но тарифъёсты кун ласянь радъянъя министерстволы — 188 миллион 600 сюрс манет (тросэз кутӥськоз куашкан калэ вуэм юртъёсын улӥсьёсты мукет интые выжтонлы), элькунысь гурт возёсъя но сиён-юонъя министерстволы — 149 миллион 700 сюрс манет (нырысь ик, гурт возёс азьын пунэмъёсты берыктыны), улосвылысь дышетонъя но наукая министерстволы — 115 миллион 300 сюрс манет.
Со сяна, коньдэт пушкын люкылӥзы 200 миллион манетлэсь трос азьвыл чаклам уксёез. Со пӧлысь 113 миллион 200 сюрс манетсэ сётӥзы лэсьтӥськонъя министерстволы — шор ёзо дышетон удысын выльдонъёс ортчытон программалы. Эшшо 200 миллион манет мыноз куд-ог министерствоослэсь пунэмъёссэс тырыны.