Дэри ёрослы азинскыны ватсаса юрттэт сётон сярысь кат кутэмын

Дэри ёрос мер но экономика удысъёссэ азинтыны 2017-тӥ арын ватсаса 72 миллион манет басьтоз. Муниципал кылдытэтлы ватсаса юрттэт сётон сярысь улосвыл катэз 21-тӥ инвожое кыкетӥ лыдӟемен юнматӥзы элькун парламентысь депутатъёс, ивортэ «Удмуртия» агентстволэн корреспондентэз. Со понна куаразэ сётӥз 75 депутат.
Тодэ вайытом, Дэри ёрослы ватсаса коньдон кулэ шоркар котырысь улослэсь ужоскетъёссэ быдэсъян понна. Тросэз Ижкарын улӥсьёс гужемлы сад-бакчаосазы пото, озьы ёросын улӥсьёслэн лыдзы кӧня ке поллы йылэ.
«Асьме муниципал кылдытэтъёслы юрттонын туж кулэ ужпум. Катэз нырысь ик Дэри ёрос вылын эскеромы», — пусйиз Удмуртиысь Кун Кенешлэн тӧроез Владимир Невоструев.
Кыкетӥ лыдӟонлы ужкагазэ кӧня ке тупатонъёс пыртӥзы. Валтӥсез герӟаськемын Дэри ёрослы ватсаса юрттэтлэсь быдӟалазэ чотанэн. Нырысь ик чакламын вал элькун коньдэтлэсь 0,3 процентсэ висъяны, 2016-тӥ арын со 150 миллион манет луысал.
Йылпумъян ужкагазъя юрттэтлэсь быдӟалазэ лыдъялозы ялан улӥсь калыклэн лыдызъя, сое Удмуртстат ивортоз. Адямилы быдэ коньдон висъян эсэпез элькун кивалтэт котькуд ар пусйылоз, одӥг муртлы 1 сюрс манетлэсь ӧжыт уз луы.
Озьы муниципал кылдытэтлы юрттэтлэн быдӟалаез, катлэн нырысетӥ чакламеныз ӵошатыса, ог кык поллы кулэсмоз — 150 миллион манетысен 72 сюрс манетозь.