Ӟуч лулчеберетъя «Высокий берег» Росси фестиваль усьтӥськиз Сарапул ёросын

Ӟуч лулчеберетъя «Высокий берег» Росси фестиваль усьтӥськиз Сарапул ёросысь Дулесово гуртын. 16-тӥ инвожое праздник кутскиз мастер-классъёсын но егитъёслэн шулдыръяськонэнызы. 17-тӥ инвожое сиё-дано усьтон, чеберлыко киужъёсъя адӟытон-вузкарон чакламын, ивортэ фестивальысь «Удмуртия» агентстволэн корреспондентэз.
18-тӥ инвожое Сарапул ёросысь гуртъёсы но черкогуртъёсы этнографи экспедициосын вуылозы, фестивалез ворсалозы, нош 19-тӥ инвожое Нечкино черкогуртысь храмын ӵук вӧсяськон ортчоз.
«Фестивальлэн нимыз ужрад ортчон интыез гинэ уг возьматы, солэсь валтӥсь ужпумзэ пусъе — Россиын улӥсь калыкъёслэн лулчеберетсылэсь инлыксэ ӝутон», — веразы радъясьёс.
Ужрадэ пыриськозы Ижкарысь, Йошкар-Олаысь, Москваысь, Чайковскийысь, Казаньысь, Пермьысь но Владимирысь фольклор коллективъёс. Ӟуч праздниклы — Троицалы — сӥзем «Высокий берег» фестиваль витетӥ ползэ радъяське ни. Ёрос администрациын верамзыя, нырысь ик фестиваль Мазунино черкогуртын ортчылӥз, кемалась ӧвӧл Дулесовое выжиз. Отысен Кам шур туж чебер адӟиське.
Фестивалез усьтонэ вуизы Удмуртилэн тӧроез Александр Соловьёв, Кун Кенешысь экономика политикая, промышленностья но инвестициосъя ялан ужась ӧрилэн кивалтӥсез Валерий Бузилов но элькун кивалтэтлэн тӧроезлэн воштӥсез, Удмуртиысь ӟуч лулчеберетъя огазеяськонлэн кивалтӥсез Сергей Фефилов.
«Сарапул ёрос элькунын одӥгез тужгес ӟуч ёрос. Татын ӟуч лулчеберетъя 16 центръёс ужало. «Ӟучьёсты котьку обыдё» веранлэсь ми мозмытскимы. Ми ӟучьёс, озьыен умой бускельёс, ваньмыныз тупаса улэммы потэ». — вераз Сергей Фефилов.
Фестивале вуэм калыклы вазиськиз Удмуртилэн тӧроез Александр Соловьёв.
«Удмуртиын сюлэсь трос выжы калыкъёс уло. Йӧскалык ужпумъёсъя керетонъёс Удмуртиын ӧвӧл. Ноку медаз, но луэ. Музъем ваньмызлы тырмоз, уж ваньмызлы тырмоз. Вань сыӵе визькыл — «Котькуд тылобурдо аслэсьтыз карзэ яратэ». Ми яратӥськомы Удмуртиез», — вераз элькун кивалтӥсь.